شوفوا مهرجان الدبكة بمعاصر الشوف هل ويك-أند: رقص، موسيقى، دبكة وسوق الأكل (الدخول مجاني)

شو عاملين نهار الأحد؟ إذا بعد مش عارفين، توجهوا على الشوف وتحديداً على ضيعة معاصر الشوف يلي رح تتحول لساحة دبكة مليانة فرح وموسيقى وتراث.

بمناسبة المهرجان السنوي للدبكة اللبنانية، ساحة معاصر الشوف والجنينة رح يتحولوا لساحة رقص ودبكة، هل حدث الفني رح يجمع حوالي 12 فرقة دبكة من مختلف المناطق اللبنانية.

حزروا شو؟ الدخولية مجانية ما بتدفعوا ولا نغلة. لكل حدا حابب يغير جو من دون ما يتكلف ويدفع شي هيدا المشروع مناسب لإلكن ولجيبتكن!

أصلاً الكزدورة على الشوف ما في أحلى منا بتشرح القلب خاصةً بهل طقس الحلو!

شو في بالمهرجان؟ أكيد رح يكون في رقص وموسيقى ودبكة ليوم الدبكة ودبيكي محترفين. إذا بتحبوا الدبكة كتير، هيدا المحل المثالي للاستمتاع بهل رقصة اللبنانية لأن في فرق رقص من مختلف المناطق اللبنانية وفي كمان فرق أجنبية.

رح يكون في عروض لأشهر فرق الدبكة بالبلد، مسابقة أفضل راقص وراقصة وأجمل حركة ومسابقة أجمل زي costume وأجمل رقصة دبكة، حلقات تعليم دبكة وعروض فنية منوعة.

ومش بس هيك، في مفاجآت مهضومة لكل الحاضرين.

سامعين “بإم جود”؟ هل بنت لي قدرت تحطم أرقام قياسية برقص الدبكة رح تكون موجودة كمان. ما تنسوا سوق الأكل وسوق المونة بالساحة، يعني مش بس رح بتتسلوا بالدبكة والموسيقى، لح تستمتعوا بالأكل الطيب والبرودات الحلوين كمان.

إذا عندكن ولاد، جيبوهن معكن رح يكيفوا بهل مهرجان أو جمعوا أصحابكن وقضوا وقت حلو بعيد عن مشاكل وهموم البلد لي ما بتخلص.

لتكمل فرحتكن، كيف ما رح تبرموا رح تحسوا بسحر الطبيعة حواليكن وألوان الصيفية والطقس الحلو وأكيد فيكن تاكلوا بهل أجواء بمطاعم السوق. او تبوردوا وتشربوا عصير فريش أو بوظة.

كونوا كتار وعملوا أحلى مشوار مع لي بتحبوهن على الشوف وغيروا جو!

وأكيد دبكوا قد ما بدكن!

إذا ما فيكن تدفعوا بنزين أو بعيد عليكن وما معكن سيارة، رح يكون في بواسط مأمنة بتنطلق من سنتر ستاركو ببيروت بسعر كتير مقبول يعني 000 150 ل.ل. على الروحة والرجعة، لتحجزوا محل اتصلوا على: 151 350 05

على فكرة، فيكن بس تخلصوا تبرموا شوي بالمنطقة وتزوروا محمية الشوف وإذا بدكن تناموا بالمنطقة شوفوا هل بيت الضيافة المميز بالباروك، وتعرفوا أكتر على تاريخ الشوف وشوفوا معنا معاني أسامي الضيع الشوفية.

المهرجان رح يصير هل ويك-أند نهار الأحد ابتدءاً من الساعة 12 الضهر ورح يستمر للساعة 7 بالليل.

هل مهرجان من تنظيم جمعية جبلنا ومحمية أرز الشوف ومتل ما قلنالكن قبل الدخول مجاني والنقل مؤمن.

مشوا معنا على المعاصر!