لقينا ٧ مطاعم بجزين مع قعدة بتطير العقل

جزين من أجمل المناطق بلبنان، ضيعة ما بتشبه باقي الضيع وتعتبر أقدم المصايف من عصور الفينيقيي، بتفوح منها ريحة الصنوبر المعتقة وبتتميز بشلالاتها الناصعة البياض وصناعاتها الحرفية واليدوية وبتحمل ألقاب عدة منها “عروس الجنوب”، “متحف الحرف” و”عروس الشلال”. من بعد ما خبرناكن عن أجمل المطاعم الموجودة بإهدن، اليوم رح نعملكن جولة على أجمل المطاعم بربوع جزين وناخدكن على كل زاوية من زوايا جزين وبكاسين لتنقوا محلكن المفضل وتشوفوا الجواهر المخفية والمطاعم الساحرة.

١. الشالوف

جزين من أجمل الضيع الموجودة بلبنان، بتتميز بشلالاتها الساحرة الجمال وغابات الصنوبر والبيوت العتيقة والمونة الطيبة واليوم رح نعرفكن على مطعم الشالوف لي بطل على الشلالات وبقدم مازة لبنانية مع منظر بطير العقل لتاكلوا وتستمتعوا بكل لقمة طيبة مع كاس عرق وريحة الطبيعة وجمال جزين. هل مطعم بقدم مازة لبنانية على أصولها وحلويات ولا أطيب والفيو كتير حلو، رح تشوفوا جزين تحتكن وتحسوا السما قريبة.

الرقم: 774 781 07

٢. لوس

مين ما بحب القعدة بالجنوب مع هوايات جزين ومنظر بياخد العقل قبال الجبال والوديان والغابات العريقة وساقية المي؟ هيك القعدة بهل محل بإختصار. هل مطعم عبارة عن جنة الأكل الطيب واللقمة اللبنانية الأصيلة المعمولة من ديّات مباركة والمقدمة مع أطيب مشروب حسب طلبكن على أنغام فيروز ووديع الصافي. حتى الحلو عندن بياخد العقل وصحن الفواكة مميز كتير، في كمان قعدة بالجنينة مع منظر بطوش.

الرقم: 330 780 07

٣. جنة الصنوبر

مطعم ساحر موجوده بأحضان الطبيعة، بيتميز بالقعدة الحلوة والمنظر لي بيحبس الأنفاس على غابة الصنوبر ببكاسين، بقدم مازة لبنانية على الأصول ولقمة طيبة بربوع جزين.

الرقم: 524 780 03

٤. بيت الغابة La Maison de la Forêt

هل البيت الخشبي قاعد بنص غابة بكاسين، بطل على الطبيعة والخضار والشجر. قدامو باحة كبيرة وقعدة بترد الروح بين الشجر بتستحلوا فيها فنجان القهوة بعد الأكل. فيكن تجوا تاكلوا ترويقة بلدية مع قعدة بطير العقل وإذا كان عبالكن تقضوا كم يوم بعيد عن العجقة ووجعة الراس، فيكن تاخدوا بيت هونيك وتعيشوا تجربة خيالية. بهل محل رح تستمتعوا بلقمتكن على الآخر، كيف ما رح تتلفتوا رح تمشوا ريحة الأرض وترتاحوا نفسياً.

الرقم: 222 800 07

٥. مطعم الحرش

مطعم الحرش بيتمتع بأكتر من قعدة، التراس الفوقاني كاشف على أجمل المناظر الطبيعية الخلابة. أكل لبناني عالأصول، مع قعدة مريحة وهوا نقي وطقس بجنن! هل قعدة بتسوى كنوز الدني، رح تشوفوا جزين تحتكن وتسرحوا بأفكاركن وتاكلوا أطيب لقمة لبنانية.

الرقم: 111 780 70

٦. لي كاف Les Caves-Roum

هل محل بقدم أطباق لبنانية وعالمية مع قعدة حجر رح تحسسكن بالدفا والجمال: قاعدين بكهف من حجر. الحبيبين رح يمبسطوا بهل قعدة الرومانسية والجو المليان حب ورواق. بالصيفية فيكن تتمتعوا بالقعدة البرانية المطلة على أجمل ما رح تشوف عينكن. الطبيعة بجزين ساحرة وما بتشبع منها العين وكل لقمة من السفرة اللبنانية بتعبي الراس. القناطر رح تذكركن بتاريخ لبنان العريق وتاخدكن رحلة سعيدة على فترة جميلة من الزمن مع الموسيقى وفيروز وكاس عرق بلدي. فعلاً هل مطعم من أجمل المطاعم الموجودة بلبنان ومارق على باب الماضي وحامل أسرار الزمن الجميل، يعني إذا عبالكن تتذكروا لبنان الحلو، ضروري تجربوا وتاكلوا أطيب لقمة.

الرقم: 292 810 07

٧. كيف

شو بدنا نخبركن عن هل محل، كل كلمات الشعر بتعجز عن وصف جمال هل مزرعة. كيف ما بيشبه باقي المطاعم ومن الضروري الحجز قبل بوقت، كل الأكل الطيب لي ناطركن جايي من الجنينة وهدف كيف يخلي الناس تتعلق بالطبيعة والأرض من جديد. الconcept تبعو مختلف عن المطعم بس بقدم أطيب أكل كل ويك-أند، بيشبه حكايات الخيال، محاط بالورد والياسمين، الشجر والعطر وريحة الأرض. الأكل بيجي على طاولتكن من المزرعة، أكيد رح تجربوا أطيب المأكولات البلدية والطبخات اللبنانية مع شفة قهوة: جلسة من العمر.

الرقم: 449 441 70