٤١ عبارة كسروانية قح بيقولوها بس أهالي كسروان

بالنسبة للكسرواني، كسروان عاصمة لبنان، كسروان البداية والنهاية، كسروان القصة كلها. وإذا بتحب كسروان واللهجة الكسروانية الأصيلة، وبدك تعرف شو معنى العبارات لي بيستعملها الكسرواني كل يوم شوفوا هل 41 عبارة وعطونا رأيكن!

1. مالنا ومال العالم: يصطفلوا، خلينا بشغلنا.

2. لكفت جعزت: غلبت عجزت مش عم يظبط شي.

3. وحرق ديبك: يخربيتك يا زلمي.

4. حاج تطبص: حاج تكتر حكي وتخبص بالحكي.

5. لاقيني على المحقان: لاقيني على عين المي لنسولف.

6. إيش باك ميطق: شو باك عم ضيع وقت وقاعد ما عم تعمل شي كل نهار.

7. يطلع حليب النور: لما الشخص يعصب كتير ويصير يزفر بالحكي.

8. جات المواي: إجت المي.

9. جا جان: إجا جان.

10. لأيش لتريدو: لشو بدك يا. 11. بلا خرعة: بلا مياعة.

12. تعا نجقجق: تعا نلقلق حكي.

13. شو جقجوق/ جقجوقة: شو حكوجي/حكوجية.

14. حول لعنا: ميل لعنا، عملنا زيارة

15. غريب وبياكل هبرة: غريب وبدو يدخل بأمور ما خصو فيها.

16. شمنتعمل هل إيام: شو أخبارك.

17. مفكر حالك قديس بسكوان: مفكر حالك حدا ما بيغلط أبداً.

18. تعا بجاه: تعا شوف هل خبرية.

19. يحرق حريشك: يخرب بيتك.

20. حاج تمعز: صوتك مقرف ما بق تغني.

21. حاج تعرك: وقف هبل.

22. باللتي هي أحسن: منعمل من الموجود.

23.الشي الشيان: من دون ما يعتل هم شي.

24. هلق تني: هل فترة.

25. إيش بيك منتنحي: شو بيك عم تحكي متل أهالي بيروت.

26. عن ينختنق: عم يختنق.

27. إيشعلي على شي: ما بأثر، منا مشكلة.

28. أي الحاصلوا: من الآخر هيك صار.

29. شو سوحِلتوا أو بعد: هل عبارة أهالي جرود كسروان بيستعملوها بس ينزلوا على ساحل المنطقة من الجرد لأن الطقس بلش يصير صقعة.

30. أيشمنتقول؟ أسمعتكش؟ شو عم تقول، ما سمعناك.

31. روح رايح: ضلك رايح جالس.

34. هيدا غْريب: هل زلمي من برات كسروان.

35. دشّرُن هون: تركن محلن.

36. أوعى الشوار: أوعى توقع بالمهوار.

37. شهلوا شوي: عجلوا شوي.

38. العملول كنا نعمل هيك : بالزمان كنا نعمل هيك.

39. ضلك نَجِور فيها: ضلك كول فيها لتخلص.

40. مخلتش شي ما عملتوش: ما تركت شي ما عملتوا.

41. أتحمَش هلق: ما تعصب هلق.

وبآخر هل مقال منختم ومنقول مع أهالي كسروان: “نيال العندو مربط عنزة بكسروان” أو شي بيربطوا بهل منطقة الحلوة.