١٠ مسلسلات لبنانية قديمة حبيناها بتلاقوها على يوتيوب

اليوم رح نخبركن عن مجموعة من المسلسلات اللبنانية القديمة يلي خطفت قلوبنا لسنين وبعدنا منتذكر الشخصيات والأسامي ومنتمنى لو نرجع نحضرها من أول جديد. لقينا ١٠ مسلسلات لبنانية قديمة على يوتيوب، انعرضوا على الشاشات اللبنانية من سنين ونطبعوا بذاكرتنا ورح نرجع نذكركن بقصة كل مسلسل.

١. مرتي وأنا

بلشت هل سلسلة مع فادي وكارين “بمرتي وأنا” ورجعوا عملوا “مرتي وبنتي وأنا” و”عيلة على فرد ميلة” وفيلم “مادام بامبينو”. المسلسل عبارة عن يوميات couple مجوزين جديد فادي وكارين، بيغلب على حياتن طابع كوميدي وطريف. فادي طبعو رايق ومهذب وحقاوي، أما كارين فطالعة عصبية وعطول عندها طلبات ما بتخلص وهيك بقضوها “دبي وعصري” كل الوقت هيي وفادي وأضحك شي بس يفوت الجار وجيه على الخط.

٢. خطايا صغيرة

مسلسل إجتماعي بيطغي علي طابع التشويق والمواقف الوجدانية، بتحكي قصتو عن موت صبحي السراج لي بيترك ورا وراق ووثايق ومذكرات بتكشف للبطل الرئيسي ساري (باسم مغنية) هويتو الأصلية وبتثبت إنو هوي إبن رجل الأعمال الغني نسيب زيادة الحقيقي ومش إبن صبحي السراج. بهل وقت بتكون سراب (كاتيا المندلق) إختو الحقيقية بعدها عم تنبش بإصرار عن خيها ساري بمساعدة جوزها بس بترفض تصدق الحقيقة بس تتعرف على خيها الحقيقي وهيك بصير ساري عم يفتش على الحقيقة ليثبت حقيقتو.

٣. زوجتي أنا

مسلسل من كتابة المبدعة كريستين بطرس وبطولة مازن معضم، جويل داغر وجيسكار أبي نادر. بتبلش قصة المسلسل وقت بتوّصل تارا فستان خياطة على قصر صوايا لماجدة خطيبة أمير، بشوفها وائل، بيستهضمها وبيعزمها على الغدا، وهيك بيتجوزوا على الرغم من رفض إمو وبيرجع وائل بيختفي نهار العرس والكل بفكروا مات. بهل فترة بتبلش تارا تنبش على حقيقة موت وائل وهيك بتتعرف أكتر على أمير وبصير في قصة حب بيناتن لحديت ما يرجع يظهر وائل على الساحة وهيك بتبلش الأحداث المشوقة.

٤. حلوة وكذابة

داليدا بنت حلوة كتير بس كذابة كتير، مغرومة لشوشوتها بالفنان “رمزي ديب” من قبل ما تعرفوا حتى، يلي كمان كتير كذاب ومصاحب أكتر من بنت بنفس الوقت. بتخبر داليدا رمزي إنها غنية كتير وهيي جاية من عيلة فقيرة وبصير يحبها مع الوقت مع إنو كاشف كل كذباتها.

٥. سارة

سارة مرا مجوزة وعندها ولاد وعايشة مستورة لحد ما بتكتشف بالصدفة إنو جوزها عم بخونها مع السكرتيرة، وبتصير مش عارفة شو بدها تعمل بحياتها وإذا بطلق لأنو هوي قايم بمصروفها ومصروف الولاد. هونيك نهار، بتنغرم بشخص محترم بصير يجرب يقويها ليصير عندها ثقة بحالها فبتقرر تطلب الطلاق وببلش الصراع على الولاد.

٦. الحب الحقيقي

مسلسل مستوحى من مسلسل مكسيكي قديم انعرض على محطة الLBC من زمان وحقق نجاح كبير بوقتها. مسلسل بيحكي عن قصة نورا، البنت الهادية والرومانسية الجاية من عيلة أرستقراطية ولي بتنغرم بشب مش من نفس المستوى فبتقرر عيلتها تجوزها شب مهذب ومرتب من مستواها إسمو ركان لتنسى حبها الأول، وهيك بصير ركان يجرب يربح قلبها.

٧. جذور

بيحكي هل مسلسل عن قصة رجل أعمال لبناني غني إسمو فؤاد مجوز ومبسوط مع عيلتو، بس بيمرض مرض خطر كتير فبيطلب من عشيقتو السابقة إنو تجبلو بنتو كارلا على لبنان لي ما حدا بيعرف عنها شي ليشبع منها قبل ما يموت. وبس تجي كارلا ما حدا بيتقبلها بسهولة ومع الوقت بتصير تتعلق بمالك إبن مرتو لبيها وبصير في قصة حب رائعة بيناتن.

٨. وأشرقت الشمس

مسلسل كسر الأرض وقت لي نزل وصار حديث الساعة وما بقى حدا ما تعلق بالقصة وبالأبطال، “إيمي الصياح” و”يوسف الخال”. بيطغي علي الطابع التاريخي والأحداث الرومانسية، فبيحكي عن الصراع بين العرب والعثمانيين واستقلال العرب ولبنان عن الحكم العثماني والصراع والعداوة بين بني عثمان وولاد جبل لبنان. بخضم هل صراع، بينغرم أحد القادة العثمانيين لي بينتمي لعيلة إقطاعية عريقة ببنت لبنانية فقيرة وبصير بدو يتجوزها بالقوة رغم رفضها، فبيوقف بوجو رفيق دربها لي بحارب كرمالها وبيربح قلبها.

٩. طالبين القرب

مسلسل ربينا علي، تم عرضو عام 1997 لأول مرة، وبسبب نجاح الكبير وصل عدد حلقات لأكتر من 100 حلقة ورجع انعمل جزء تاني. بتحكي أحداث المسلسل عن قصص حب وجازة وارتباط وطلاق وغيرها من المواضيع الإجتماعية بين شباب المجتمع اللبناني بوقتها. كان يعرض هل مسلسل قصص قصيرة بكل حلقة ومشاهد سريعة لعلاقات عاطفية مختلفة. أكيد غنية المسلسل بقيت علقانة براسكن، والغريب إنو أغلب الممثلين المعروفين اليوم كانوت بوقتها أبطال طالبين القرب وكان هيدا المسلسل سبب شهرتن الواسعة متل باسم مغنية ويورغو شلهوب وكارول الحاج وفيفيان أنطونيوس.

١٠. سجينة

قصة مرا مجوزة إسمها سمر عايشة حياة زوجية تعيسة مع جوزها غطاس العاطل عن العمل ولي بعذبها كتير هوي وإمو. بتصير حياتها جحيم نهار لي بيعرض عليها مدير عملها شغل إضافي لينزاد معاشها لأن ببلش جوزها يتهمها بالخيانة وبيشحطها صاحب الشغل لأنها صدتو ورفضتو وبتصير بلا معاش وإعالة لحديت ما تتعرف على محامي مهذب وجايي من عيلة قوادم بقرر يساعدها وبصير مع الوقت في قصة حب بيناتن.