١٠ محلات فيكن تعملوا فيها بيكنيك بأحضان الطبيعة بلبنان

الضهرة مع العيلة أو المشاريع مع الأصحاب على أماكن وحدائق عامة هي من أجمل المشاريع الشبه مجانية وأكترها تسلاية. بس نتفق على مشروع منتحمس ومنصير نفكر شو عبالنا ناخد أكل ومشروبات وحلو وألعاب وغراض وشو رح نلبس وكيف رح نتصور بس منلاقيها صعبة نلاقي المحل المثالي لي حابين نروح علي ونعمل بيكنيك، لهيك اليوم رح نعرفكن على مجموعة من الأماكن لي فيكن تعملوا فيها بيكنيك بالهوا الطلق بين أحضان الطبيعة.

١. ذا باين ياردز The Pine Yards، مار موسى-الدوار

موقع هل محل كتير حلو بأجمل نقطة بالمتن بطل على أحلى منظر. الولاد والكبار رح يحبوا هل محل، فيكن تجتمعوا كعيلة كبيرة مع بعض بهل محل وتتغدوا بأحضان الطبيعة وتتركوا الولاد يلعبوا ويتسلوا والكبار يسولفوا ويتحدثوا.

الرقم: 629 281 03

٢. بيكنيك باي لوريس Picnic by Loris، برمانا

من أجمل المواقع لي فيكن تعملوا فيها بيكنيك بلبنان، الألوان الفرحة رح تمنحكن شعور بالفرح والبسط. فيكن تطلبوا أكل ومشروبات وتتأملوا جمال هل مكان مع الناس لي بتحبوهون وتاخدوا أجمل الصور. على فكرة المغيب من هل محل بياخد العقل!

الرقم: 500 111 71

٣. بيوماس Biomass Restaurant، جربتا-البترون

مطعم بيوماس بجرود البترون مطرح خيالي بأحضان الطبيعة رح ياخدكن على عالم تاني مليان شجر صنوبر ولزاب وخضار وأكل طيب. بس توصلوا على بيوماس رح تحسوا بالسحر الموجود والجمال يلي بتعجز الكلمات عن وصفو: شجر، مراجيح، طاولات وكراسي خشب، مزرعة، حيوانات، قعدة بالغابة، مشروب وعصير، ورود وأكل كتير طيب. هل بيكنيك فيو يكون المفاجأة الرومانسية يلي عم تحضروها لحبيبكن! ما في أحلى من هيك قعدة رومانسية مع شوية حب وصور حلوة!

الرقم: 532 532 03

٤. لو كامب، دير الحرف

دير الحرف من أجمل المناطق بلبنان يلي مش آخدة حقها، وهل محل بالذات الموجود بين الشجر رح ياخدكن على محل تاني. أول ما توصلوا رح تتأملوا جمال الطبيعة وتنغرموا بهل مكان لي بيتمتع بالهدوء والهوا النضيف النقي والقعدة الرومانسية. الولاد كمان إلن حصة، رح يتعملوا يعيشوا مع الطبيعة ويخلوا خيالن يسرح ويلعبوا.

الرقم: 677 355 76

٥. أرصون فيلادج، أرصون-المتن

محل مناسب للبيكنبك والتخييم، بتلاقوا عندن طاولات كبيرة وشمسيات وبانغالوس وألعاب للولاد ونشاطات لكل حدا حابب يعمل بيكنيك مع العيلة أو مجموعات كبيرة.

الرقم: 111 228 71

٦. حديقة راسماسقا، راس مسقا-الكورة

حديقة بتتمتع بمنظر بطير العقل على البحر، المقاعد الملونة، المراجيح، المساحات الكبيرة، الخضار، الأكل الطيب، الشجر هني العناصر لي رح تخليكن تنغرموا بهل حديقة. فيكن تسمعوا صوت الطبيعة، تروقوا أعصابكن وتاكلوا تحت فيّات الشجرات. في حصان كتير مهضوم رح تتلاقوا في كمان، إسمو “أليكس”.

الرقم: 470 170 79

٧. جلسة المزاريب، المزاريب-جبيل

هل محل بوفر جلسة ما في منا بأحضان الطبيعة، جنب النهر، مع قعدة قش ومقاعد ملونة لتستمتعوا بوقتكن على الآخر. الولاد رح يحبوا هل مكان كتير ويفلتوا بالطبيعة ويلعبوا. يلا ضبوا الشنط ويلا على المزاريب لتعيشوا تجربة استثنائية.

الرقم: 721 198 03

٨. تيرا فيردي Terra Verde، بعقلين-الشوف

على ضفاف نهر بعقلين قاعد هل محل، تخايلوا حالكن عم تتمرجحوا حد النهر وعم تعملوا مشاوي وتسمعوا صوت المي والطبيعة. هل محل مناسب للكبار والزغار، في منامة كمان إذا مش حابين تسربوا على البيت. ما تنسوا تجيبوا أرغيلة معكن لتاخدوا أطيب نفس أرغيلة حد النهر!

الرقم: 712 962 71

٩. بالفيّ، النبطية

ميلو صوب الجنوب وتعرفوا على هل محل لي بيشبه حكايات الخيال. صاحبة هل مشروع حولت حديقة البيت لمساحة للبيكنيك مليانة فن وجمال وحب.

الرقم: 177 574 71

١٠. مغراق عبدلي، البترون

استمتعوا برحلة ساحرة على ضيعة مغراق الغرقانة بالمي والبيت الخشب لي مخبى فيها وعملوا أحلى بيكنيك. هيك قعدة بدها مشاوي من دون شك، طلعوا معكن اللحمة والكفتة والطاووق وهني بيعطوكن المتنقل. رح توصلوا وتلاقوا المي محيطة بالبيت رح تحسوا حالكن بفينيز للحظة: تجربة بتاخد العقل!

الرقم: 118 861 71