٩ جمل ما بتطلع إلا من تم الجنوبي

أديش منلتقي بأشخاص ومجرد ما يفتحو تمن دغري منعرف أصلن و المنطقة بس من اللهجة؟ يمكن من أكتر الامور يلي منسمعها عن اللهجة الجنوبية إنها مهضومة و بتعطي أسلوب بالحكي بميزها عن غيرها من اللهجات اللبنانية. فإذا حابين تعرفوا اكتر عن اللهجة الجنوبية، تعوا شوفوا معنا ألفاظ وكلمات اهل الجنوب ربيوا عليها و بيتميزو فيها مع انو اد ما حكينا ما بنخلص!

1. “أستناوللي الهيداك من الهونيك” = ناولني هيدا الغرض

أهل الجنوب عندن طريقن الخاصة ليدلوكن عل الأشيا و من ألطفها هيدي وهضاك و هضكهلي و هونيكهلي بس يا ويلكن تضيعوا بالكلمات وتجيبوا الهداك يلي حد الهداك التاني!

2. “يا مشحر” “شحار يلتك لت” = الهم يركبك

بالعادة بيستعملوها الجنوبيي لما تعملوا مصيبة كبيرة…متل انو تنسوا الغسيلات برا وهيي عم تشتي.

3. “أني” = أنا

هيدي من اكتر الكلمات الجنوبي بحب يشد عليها و من أهين الطرق لتعرفوا انو جنوبي بلا لبكة و بلا سؤال.

4. “بديش” “بعرفش” “أبعرفش” “ما لقيتوش” “خصنيش” “أفش” “ما أكلتش” = ما بدي – ما بعرف – ما لقيتوا – ما خصني..

ال “لا” ما بتكفي عند الجنوبي ليعبر عن رفضه…لازم يزيد حرف “الشين” ليعطي نكهة و قوة بالرفض غير شكل (بتخاف ترجع تسألوا يا خيي).

5. “يا اباري” “تبحش قبري” “شو يا اباري اسا جييت” = تقبرني

هيدا الحكي الفخم والتقيل ما بيطلع إلا من تم ستك بالجنوب وأكبر دليل أديه بتحبك وعندها ياك بالدني.

6. “إسي” = بهيدي اللحظة

أسلوب كتير جنوبي للتعبير عن اللحظة و كتير بيستعمل لما إمك تقلك تطلع تجيب كم غرض من الدكانة و إنت ما إلك خلق…مش إسا (مش وقتها).

7. بدي بعزء = بدي اصرف

أول ما يقبض الجنوبي بضيع وين يصرف مصرياتو…بس لما يجي ع بالو يدلع حالو بقلك بدي بعزء.

8. “الظيعة” = الضيعة / “مليح” = منيح

أحب شي ع قلب الجنوبي انو يطلع و ينزل و يبدل أحرف … بيخترعلك أهضم و ألذ حكي ما بيخطر حتى عالبال.

9. طربيزا = طاولة صغيرة / النملية = خزانة المونة

إذا بتفوت ع المطبخ اللبناني الجنوبي ممكن كتير تسمع هالألفاظ… فالمهم ما تغلط تتضلها الحجة راضية عنك و مبسوطة