لقينا ١٢ مطعم إيطالي ساحر بلبنان

شو سر الأكل الإيطالي؟ الأكل التلياني غالي على قلوب كتار بسبب وجود أطباق ونكهات مختلفة بترضي جميع الأذواق بالإضافة لإستخدام المكونات الطبيعية مع الباستا والبيتزا متل زيت الزيتون والخضرا والصلصات السرية بالمطبخ. نوعية الأكل الطيب والقعدة الراقية والرومانسية هني العوامل الأساسية لي بخلوا كل حدا مولع بزيارة المطاعم الإيطالية. لهيك، قررنا نعرفكن اليوم على مجموعة من أجمل المطاعم الإيطالية الموجودة بربوع لبنان.

١. سود، ضبيه

هيدا المحل ما بقدم بس المطبخ الإيطالي، بيعمل كمان كل أطباق الشرق الأوسط بأحسن طريقة، ورح تلاقوا عندو قائمة مخصصة بس بالأكل الإيطالي التقليدي. يعتبر سود من أجمل المطاعم لي بتحضر بيتزا وباستا بلبنان، بتوصلوا بتستقبلكن الأضوية الخافتة والريحة الطيبة من بعيد. رح ياخدكن الجو الداخلي بالمطعم والأصناف المختلفة على شي جزيرة إيطالية أول ما تفوتوا وتجربوا عجينة البيتزا الرقيقة مع صلصة شغل إيد وجبنة الموتزاريلا على الوج لي بتشق النفس. القعدة بهل محل مميزة كتير، الديكور جوا رح يضفي طابع ساحر على الأكل ويعطيكن راحة نفسية، أما القعدة برا قدام الكوكتيل بار بتتميز بالجو الexotic وفيكن كمان أول وصلتكن تقعدوا على التراس بالهوا الطلق على الطاولات والكراسي الخشب وتتمتعوا بالديكور ساحر. هل محل مناسب لكل أوقات النهار إن كان ترويقة، غدا، أو وعشا لأن أكيد لازم تدوقوا الباستا الشهية لي بحضروها قدامكن بجرن سخن مع الجبنة!

الرقم: 056 888 78

٢. ماريولينو، البترون

هلق رح نطلع مشوار على منطقة البترون الساحرة، لنزور سوا مطعم ماريولينو المخبى بشوارع البترون العتيقة، هوي جوهرة مخفية بتفوح منها ريحة الأكل الطيب وبتتميز بقعدة رومانسية بترد الروح. فيكن تقرروا تقعدوا برا أو جوا، لتستمتعوا بأطباقكن الإيطالية التقليدية، بس القعدة برا إلها رونقها الخاص، من ورا الإضاءة الخافتة والجو الرومانسي كتير. حتاكلوا عند ماريولينو الأكلات الإيطالية المميزة لي فيها كل المكونات والنكهات لي حتخليكن تدوقوا أصول المطبخ الإيطالي بكل كدشة إنتو قاعدين وما تنسوا تاخدوا أجمل الصور التذكارية.

الرقم: 555 766 76

٣. تشيري لاين، حمانا

مين بعد مش طالع على ضيعة حمانا؟ هل ضيعة الحلوة بقلب الجبل مغمورة بالشجر والخضار والورود والكرز وهيي المحل المثالي لتنسوا في همومكن وتتأملوا جمال لبنان. تشيري لاين موجود على الشير حد قصر لا مرتين الأثري، إذا قعدتوا برا بتسمعوا صوت المي الجارية وبتاكلوا أطيب لقمة تليانية على الأصول. بس يكون الطقس دافي لازم تقعدوا برا لتتمتعوا بالمناظر الطبيعية الحلوة واللقمة الطيبة إنتو وعم تسمعوا موسيقى رومانسية. هل محل مش بس بقدم أطباق إيطالية، بقدم أطباق فرنسية كمان، يعني فيكن تستمتعوا بهل عالمين بمكان واحد. وإذا عبالكن، فيكن كمان تجربوا الجلسة جوا حد الكوكتيل بار، لي رح تسحركن من ورا القعدة الحجر، الطاولات الراقية والديكور الفخم.

الرقم: 588 335 71

٤. بافاغلينو، الأشرفية

على درج مار نقولا قاعد مطعم إيطالي رومانسي كتير، مزين بالورود والمصابيح الخافتة، الطاولات والشرشف الأبيض والأحمر والجو البسيط المليان حب لي رح يخليكن تحسوا حالكن بشوارع روما الأثرية. هل محل تأثر بإنفجار بيروت، لكنّ رغم كل شي قدر يرجع يفتح بوابو ويقدم أطيب لقمة إيطالية مع قعدة حلوة على الدرج. بافاغلينو بقدم مجموعة واسعة من السلطات الطازة والبيتزا والباستا والوجبات والأطباق الإيطالية والحلويات.

الرقم: 080 091 81

٥. سابوري إي فيني، جبيل

وهلق منطلع على منطقة جبيل الساحرة لي ما وقفت نهار تخلي قلبنا يدق لنتعرف على مطعم سابوري إي فيني المتخصص بالأكل التلياني. أي نوع من البيتزا بتحبوا؟ “مارغريتا” ، “بيبيروني” أو “نابوليتان” أو يمكن طبق “الرافيولي”؟ ما في شك كل أنواع البيتزا والباستا بهل محل رح ياخدوكن على عالم تاني. سابوري إي فيني بيتميز بقعدة برا بالجنينة المزينة بالورود والعشب الأخضر مطرح ما فيكن تعيشوا الحلم الإيطالي وتحسوا بجمال الحياة، أو فيكن تنقوا القعدة الجوانية لي بتحمل طابع كلاسيكي لكل مين مولع بإيطاليا وسحرها من خلال المقاعد الخشب، الطعام اللذيذ والنبيذ الأصيل.

الرقم: 333 734 81

٦. بوتشا

هل محل عندو فرعين، الأول بالأشرفية فتح جديد مش من زمان والتاني بصيدا ولي بيعرف بوتشا أكيد في يخبرنا قديش هل مطعم عم يتميز ويتفنن بالأكل الطيب والخدمة الممتازة. ديكور المحل بيطغي علي لون الأبيض والأحمر، أول ما تفوتوا رح تلاقوا طاولات خشب، شرشف أحمر وأبيض، أجواء رومانسية وبسيطة بنفس الوقت والأكل رح يوصل لعندكن مع شوية حب وغرام ونكهات exotic. إذا عبالكن فيكن تروحوا مع أصحابكن أو مع حبيبكن بموعد رومانسي لتستمتعوا بالأصناف التليانية وبس تخلصوا الأكلات ما في أحلى من إنو تبوردوا بفنجان ليمونتشيلو شغل ديّاتن.

الفرع الأول: صيدا

الرقم: 444 273 81

الفرع التانى: الأشرفية

الرقم: 518 684 76

٧. ماريو إي ماريو، الاشرفية

مين مولع بالمطبخ الإيطالي التقليدي؟ هل محل جنة إيطالية موجودة ببيروت رح تاخدكن على شوارع صقلية من خلال الديكور واللقمة التليانية الطيبة. أول ما توصلوا، رح يفرفح قلبكن لأن القعدة بتاخد العقل ورح تاكلوا أطيب لقمة وتعملوا أجمل ذكريات. القعدة برا تحت القش والسلل كتير مهضومة وexotic بتتميز بمقاعد بيطغي عليها لون الأبيض والأزرق والعشب الأخضر، أما القعدة جوا فهيي مستوحاية من المطاعم التليانية الكلاسيكية من خلال المقاعد الخشب والمصابيح الملونة. صاحب المحل الشيف ماريو بقول إنو كان حلمو من هوي وزغير يفتح مطعم إيطالي تقليدي، ونحنا مبسوطين إنو قدر يحقق حلمو ببلدو لبنان.

الرقم: 036 888 76

٨. أبيتيتو تراتوريا

هل مطعم هوي عبارة عن بيت إيطالي زغير موجود بلبنان، بيتمتع بقعدة خشب بيطغي عليها الطابع الرومانسي من خلال الشرشف الأبيض والأحمر، الرومانسية بإضاءتو الساحرة لي بتضفي جمال استثنائي على الطاولات، وصولاً لمشهدية المطبخ التلياني الأصيل. قلبكن رح يدق بسرعة بهل محل إنتو وعم تراقبوا الديكور وتستمتعوا بالأكل بجو دافي ومريح وريحة رح تاخدكن على رحلة ممتعة على روما من خلال أطباق السباغيتي بولونياز، الديافولي بيتزا، الروكوتا بالسبانغ والمعكرونة مع صلصلة البيستو الشهية.

أبيتيتو عندو أكتر من فرع: الجميزة، الحازمية، الحمرا، برمانا، البترون، بس نحنا منحب كتير فرع البترون.

الرقم: 249 299 03

٩. باريطاليا، جبيل

رح نرجع على جبيل، هل منطقة لي ما بينشبع منا، كل زاوية فيها جوهرة. باريطاليا جوهرة مخباية بالسوق العتيق بيتميز بتنوع غني بالأطباق، هل مطعم قريب من المينا، ديكوراتو كلاسيكية مريحة، الخدمة سريعة ومميزة، وبقدم كل أنواع الأصناف الإيطالية مع مكونات شهية وإضافات لذيذة متل النعنع وأعشاب البحر المتوسط وغيرها من النكهات المنعشة.

الرقم: 505 943 09

١٠. غافي، مينة الحصن-بيروت

يعتبر مطعم غافي من الكلاسيكيات الإيطالية ببيروت، وهوي من أكتر المحلات الرومانسية. بغض النظر عن أصناف الطعام الراقية، بقدم مطعم غافي تجربة إيطالية أصيلة وأنيقة. من العجينة الرقيقة والمقرمشة للصلصة المعمولة بشغف للطبقة الطازا من الجبنة، رح ياخدكن غافي على رحلة الإستماع بالبيتزا والباستا وكأنها جوهرة ونكهتها ما فيكن تنسوا طعمتها كل حياتكن.

الرقم: 353 999 01

١١. زهرتوني، القبيات

هلق رح نبعد شوي مشوارنا ونطلع صوب الشمال على ضيعة حلوة كتير إسمها القبيات لنعرفكن على مطعم موجود بوادي حلسبان المقدس إسمو زهرتوني. طوني زهر إنسان بيعشق الحياة والأكل الإيطالي وضيعتو القبيات، كرمال هيك، قرر يجيب طعمات إيطاليا على قلب الضيعة وياخدنا جولة على أجمل زاوية بالقبيات. القعدة بهل محل بترد الروح وصدقوا هل ضيعة من أجمل ضيع لبنان بطبيعتها الإستثنائية وأكلها الطيب. بتجوا بتقعدوا بهل محل الموجود بغابات حلسبان، بين الشجر والوديان، مطرح ما رح تحسوا حالكن بحلم. عند زهرتوني رح تاكلوا باستا شهية معمولة على الإيد، بشغف وحب وفن مع خلطات سرية وطعمات متنوعة وشهية وكمان بتجربوا أطباق تليانية مختلفة وبيتزا بيتوتية معمولة من أجود المكونات.

هل محل بيفتح بالويك-أند

الرقم: 844 469 81

١٢. أفانتي، وسط بيروت

أفانتي مطعم إيطالي كلاسيكي بقدم أطيب الأطباق الإيطالية المشهورة المعمولة على الإيد بكل بساطة وفن بالإضافة لتحضير البيتزا على الحطب متل ما بيعملوها بالضبط بروما. القعدة بهل محل فخمة، اللون الأخضر الفاتح بيطغي على الديكور مع صور لمارلين مونرو وأشهر نجوم العالم القديم. هل محل رح ياخدكن رحلة ممتعة بالزمن على شوارع وسط روما لي بتشوفوها بالأفلام الرومانسية لتحسوا بعظمة إيطاليا وسحر مأكولاتها. بقدم هل مطعم قائمة متنوعة من الأطباق التليانية أشهرها أطباق الباستا والبيتزا وطبق الرافيولي. جربوا الكوسا المقلية أو قطع الخبز المتبلين بأربع أنواع جبنة وخلطة الزيتون المتبل والبيتزا المشوية على الحطب مع مكونات طازة وجبنة خفيفة.

العنوان: وسط بيروت، حد ميتروبول Métropole

الرقم: 992 990 01