لقينا ١٤ من أجمل الفنادق الموجودة بجنوب لبنان

عطلة الأضحى جايي وإذا عبالكن تنزلو صوب الجنوب، مننصحكن تشوفوا الليستا لي حضرنالكن ياها. ومتل ما بتقول الغنية “يا رايح عالجنوب والهوا جنوبي سلملي عالجنوب سلملي ع محبوبي”، اليوم مشوارنا رح يكون على هل جزء المقدس من بلدنا، الجنوب الحبيب لي بيتميز بالبحر النقي وغابات الصنوبر والزيتون لنتعرف على ١٤ من أجمل الأوتيلات الموجودة بالجنوب.

١. إيل بوتيك أوتيل El Boutique Hotel، صور

هل أوتيل موجود بأحضان عروسة البحر صور، بيحمل إرث كبير، كان حبس للبنات بالزمان رجع تحول لمحل لصناعة الساعات قبل ما يصير أوتيل. هل فندق مرتب كتير وبتلاقوا في مساحة خضرا ومطعم. رح تشوفوا كمان على سطح الفندق محل بقدم مشروب عندو إطلالة استثنائية وقت غروب الشمس، وجو حلو مع موسيقى بترقص خلال الأسبوع وحفلات بالويك-أند، بضم المينو بهل محل وجبات “التاباس” وكوكتيلات رائعة.

الرقم: 960 741 07

٢. دار ألما، صور

عطلة الأضحى قربت وإذا بعدكن محتارين وين تقضوا هل ويك-أند، مننصحكن تزوروا دار ألما لي هوي عبارة عن فندق ومطعم على البحر، بتطلعوا على البلكون بتلاقوا البحر تحتكن وبتسمعوا صوت الموج. النومة بالدار بترد الروح وهيك فيكن كمان تسبحوا بشط الصور المعروف بناضفتو والمي حلوة. هل محل متل الحلم رح يحسسكن إنكن قاعدين بجزيرة أمالفي الإيطالية من ورا المنظر الساحر على البحر والقلعة بالمي والألوان والرومانسية والأكل الطيب.

الرقم: 082 740 07

٣. ريف دو لا مير Rêve de la Mer، الناقورة

الناقورة من أجمل المناطق على البحر بلبنان ولي بعد مش رايح عليها صار وقت يضب الشنطة ويروح على رحلة من العمر. هل أوتيل قريب من البحر، الغرف بقلبو كتير مهضومة وفيكن تطلبوا غرفة مع جاكوزي وبالكون، البيسين كتير فخمة، هون فيكن تسترخوا وتعيشوا لحظات حلوة.

الرقم: 468 460 07

٤. منتجع الفنار Al Fanar Resort، صور

إنتوا وعم تمشوا بشوارع صور القديمة، فتشوا عن محل عندو واجهة على البحر وبتكونوا وصلتوا. أول ما تفوتوا على منتجع الفنار، رح تلاقوا البحر قبالكن والمتعة عبالكن. هل أوتيل عندو بيسين ومطعم على البحر لي هو شي لازم تجربوا بقدم مأكولات بحرية شهية وبيضفي علي الطابع الغجري الفينيقي.

الرقم: 111 741 07

٥. أوتيل ليتوال دو لو L’étoile du Loup، جزين

هل أوتيل عبارة عن مجموعة بيوت مهضومة مغطاية بالقرميد وبيطغي عليها الجو الجبلي، محاوط بالشجر، بتلاقوا كمان في بيسين وقعدة مهضومة. بس تفوتوا على البيت رح تلاقوا تخت وحمام ومطبخ زغير وقعدة خشبية وسطيحة مع chaises longues ومقاعد كتير سلبي لإذا طلع عبالكن تتشمسوا أو تشموا هوا نضيف. هل محل عبارة عن قرية زغيرة رح تلاقوا فيها الراحة بعيد عن ضجة المدينة وعجقة الشغل مع أهم قصص منبش عليها بالصيفية، المي والطبيعة وبرودات الضيعية.

الرقم: 425 781 07

٦. أوبيرج دو تير Auberge de Tyr، صور

هل فندق من أجمل الأوتيلات الموجودة بجنوب، بيضفي علي الستيل الغجري وبيتميز بقعدة على العشب مع مسبح وجنينة بطير العقل. بهل محل مش بس رح تجوا وتناموا وتقضوا نهار بالغرفة، رح فيكن تعملوا كتير نشاطات متل السباحة، البرونزاج، ركوب الخيل وزيارة المزرعة والجنينة وممارسة رياضة المشي والركض، هيك بتروقوا راسكن وبترجعوا على بيتكن معبايين طاقة وفرح.

الرقم: 233 339 71

٧. فندق ريف زفتا، النبطية

أوتيل مهضوم، بخلي الزوار يتمتعوا بإقامة مريحة، موجود بمنطقة النبطية وفي بيسين وفسحة للولاد وهيك بتقضوا وقتكن إنتو وعم تسترخوا والولاد عم يلعبوا.

الرقم: 166 789 70

٨. دار كاميليا، صور

دار كاميليا عبارة عن بيت أثري تحول لدار استقبال، بيحمل طابع غجري، البيت من حجر والتخت بكل الغرف متل حكايات الخيال مع برادي داير من دار وتكايات غجرية، والحيطان ملونة، بس توقفوا وتتأملوا لبعيد رح تحسوا الشبابيك مفتوحين على حكايات الخيال.

الرقم: 500 771 81

٩. غرين لايك أوتيل Green Lake Hotel، جزين

هلق منروح على ضيعة جزين لي بتتميز بتاريخها وآثارها ومناظرها الطبيعية الرائعة وبيوتها التراثية وطبيعتها وغابة الصنوبر العظيمة وهي وحدة من أجمل المناطق بلبنان عطول مليانة حياة وجمال وحب وأكل طيب، هل أوتيل متوج بالقرميد الجوري وبيتميز بقعدة من العمر، مع البرودات الحلوين والنومة المريحة والترويقة الغير شكل.

الرقم: 535 781 07

١٠. أوك هيلز Oak Hills، عين إبل

أوتيل موجود بضيعة كتير حلوة، بيتميز بقعدة مليانة ثقافة وفخامة، بتلاقوا بقلب الأوتيل نادي، بار بقدم أطيب المشروبات، جنينة للولاد، مطعم مع قعدة بتجنن وبيسين.

الرقم: 126 471 07

١١. أوتيل أسامينا، صور

هل أوتيل رح يذكركن بغنية جوليا الشهيرة “يا قصص عم تكتب أسامينا” لأن أول ما توصلوا رح يكتب هل محل قصة مؤثرة بقلبكن وذاكرتكن. هل أوتيل عبارة عن بيت حجر، مصابيح وشبابيك أثرية، بطل على البحر وبتحكي حكاية صور. بتلاقوا في أحلى قعدة على البلكون مع منظر على البحر وقعدة تحت النجوم بالليل، فيكن كمان تنزلوا تعملوا سبحة غير شكل إذا مشوبين أو تاكلوا أطيب لقمة بالمطعم.

الرقم: 499 344 07

١٢. أوتيل إيريس فلاور Iris Flower Hotel، جزين

إذا بعد ما تعرفتوا على هوايات جزين الحلوين والشلالات وغابة بكاسين، صار وقت تعملوا مشوار صوب هل منطقة المميزة وتقضوا عطلة بين أحضان الطبيعة الحلوة. جزين ضيعة لبنانية أصيلة فيها كل شي عم تنبشوا علي لتقضوا عطلة مثالية، هل أوتيل رح يستقبلكن ولأن إنتو بتستاهلوا برودات جزين الحلوين لازم تعيشوا هل تجربة وتهربوا من العالم كم يوم.

الرقم: 999 781 07

١٣. باين فيو أوتيل Pine view Hotel، جزين

بعدنا بجزين وهلق رح نروح على أوتيل باين يلي بيكشف على أجمل المناظر الطبيعية بالمنطقة، هون فيكن تشوفوا غابات جزين والجبال المجيدة وتشموا هوا نضيف وتاكلوا أطيب لقمة بالمطعم الموجود بالأوتيل وترجعوا تسهروا بالليل تحت النجوم وتسرحوا بأفكاركن أو تقضوا وقت ثمين مع أغلى الأشخاص على قلبكن وتحكوا عن الحياة وتتفرجوا على الطبيعة والقمر.

الرقم: 444 810 07

١٤. ريست هاوس Rest House، صور

الختام رح يكون بمنطقة صور وهلق رح نعرفكن على هل إستراحة الموجودة على البحر لي رح تاخدلكن عقلكن وقلبكن. بتوصلوا بتشوفوا البحر على مد عينكن والنظر بترجعوا بتسبحوا بالبيسين وبتاكلوا أطيب لقمة مع فواكي وعصير ليبورد قلبكن. أوض الأوتيل مرتبين كتير مع تصميم رومانسي، رح تلاقوا فين الراحة والفخامة.

الرقم: 000 742 07