٧ مخيمات صيفية فيكن تحطوا ولادكن فيها هل صيفية بلبنان

إجت الصيفية وخلصوا مدارس الولاد وكتار من الأهل بيبقوا مشغولين ومش قادرين يهتموا بولادن بالنهار بسبب الشغل والتعب أو يمكن السفر، وفي أهل كمان ما بحبوا يشوفوا ولادن قاعدين كل النهار بالبيت على التلفونات مش عم يعملوا شي أو يحركوا، لهيك لقينا ٧ مخيمات صيفية بيعملوا نشاطات بالصيفية لولادكن ورح نخبركن عن كل مخيم.

١. مخيم Rainbow Sumner Camp، الحمرا

مخيم صيفي بيجمع عالم الرياضة والألعاب والنشاطات مع عالم الفن والرسم والموسيقى والطبخ، بالإضافة للثقافة العامة. هل مدرسة الصيفية مش بس رح تخلي ولادكن يتسلوا ويلتهوا، رح تخليهن يتثقفوا كمان.

الرقم: 385 337 03

٢. مخيم My Mini Camp، وسط بيروت

هل مخيم رح يمكن ولادكن من تنمية شخصيتكن وثقتن بنفسن من خلال تمارين ونشاطات وألعاب ودورات تدريبية. الفرح والتسلية والمرح بهل مخيم ما بيخلصوا، وعطول في شي بيتعلموا منو هني وعم يتسلوا ويكتشفوا الحياة ومواهبن. هل مخيم بيعمل كمان رحلات للولاد وتخييم ليكتشفوا لبنان.

الرقم: 908 088 03

٣. مخيم Miles of Smiles، أوتيل موفنبك-بيروت

هل مخيم بيعمل كتير نشاطات وألعاب متل الرقص، الفوتبول، الباسكيت بول، السباحة، الفن وقصص كتير بتسلي وبتخلي ولادكن يتعرفوا على غير ولاد ويعملوا أصحاب ويتعلموا قصص جديدة.

الرقم: 112 915 03

٤. مخيم Enfants du Soleil، الزلقا

إذا كانو ولادكن بفضلوا الفرنساوي، فهيدا المخيم هوي الجنة لي عم نبشوا عليها، الكل بيحكي فرنساوي ولبناني. هل مخيم بيشتغل على شخصية الولد وفكرو ونشاطو البدني من خلال التعرف على أصحاب جداد، نشاطات ومشاركات خبرات، رياضة وتعلم أخد المبادرات لكل ولد وهيك بصيروا يعرفوا يطلعوا من حالن وهيك بتساعدوهن يحققوا أحلامن الزغيرة على المدى البعيد.

الرقم: 122 881 01

٥. مخيم Colonie des Rêves، زوق مكايل

متل ما إسمو بقول هوي محل بيشبه الأحلام رح يخلي ولادكن يفرحوا ويحسوا بالصيفية خاصةً من بعد الزربة الطويلة من خلال ممارسة الرياضات الخارجية، النشاطات الثقافية والترفيهية وقصص كتير مهضومة وبتسلي.

الرقم: 999 498 70

٦. مخيم Colonie des Jeunes Amis، الحدت-بعبدا

هل مخيم موجود بمدرسة الأباء الأنطونيي، يعني بحرم مدرسة عريقة ومعروفة والحلو إنو في تأمين على ولادكن من كل النواحي. هل مخيم بنظم نشاطات رياضية عديدة وبخلي ولادكن يعملوا رياضة ويتحركوا وأكيد من أهم الإشيا لي فيهن يعملوها السباحة يلي رح تسمحلن ينبسطوا ويبوردوا بهيك طقس.

الرقم: 672 544 03

٧. مخيم صيفنا تسالي، صيدا

إذا بعد مش عارفين شو بدكن تعملوا بولادن هل صيفية وعبالكن شي مميز توجهوا صوب مدرسة NEIGB وسجلوا ولادكن بالكولوني لأن أكيد ما رح تندموا، كل شي بيعملوا فريق عمل صيفنا تسالي بروح حلوة. ولادكن رح يستفيدوا من النشاطات الخارجية والألعاب والتحديات لي ما بتخلص ورح يتعرفوا على ناس جديدة ورفقات جداد، من ضمن النشاطات لي رح يعملوها: بيكنيك، رقص، مهرجان الألوان، يوغا، زومبا، مشاهدة أفلام، إعادة تدوير، رسم وكتير قصص غير مهضومة وبحبوها الولاد بالعادة.

الرقم: 420 320 70