١٠ محلات فيكن تقضوا فيها شهر العسل بلبنان بلا ما تسافروا

كلنا بنعرف قديه العرسان بعيشوا توتر كبير قبل العرس بفترة بسبب التحضيرات والتجهيزات لليلتن المميزة. من هون انطلقنا لنساعدكن تلاقوا محلات تقدروا تبلشوا فيها حياتكن الزوجية وتقضوا شهر العسل وتنبسطوا.

انسوا باسبوراتكن وجهزوا الشنط وتعوا معنا بهالجولة:

١ – منتجع Kalani بمنطقة حالات

للاشخاص يلي بيحبوا البحر، “كالاني” منتجع كتير فاخر على شاطئ حالات بمنطقة جبيل، بتعيشوا في تجربة مميزة من جميع النواحي، من أكل لسباحة ومناظر خلابة، وكأنكن على شواطئ اليونان. كل فيلا خاصة بتجي مع أحلى ديكور وعلى البحر.

الرقم: 050 504 76

٢ – Ô Chalet أنفة بالكورة

كمان للاشخاص يلي بيحبوا يقضوا الصيفية قراب من البحر منتجع Ô Chalet بيخليكن تعيشوا تجربة كتير مميزة عالبحر وبمحل رائع ومناظر بتعقد.

الرقم: 055 982 78

٣– Sierra Beachfront البترون

البترون من أقدم المدن بلبنان وهي منطقة سياحية بامتياز بيقصدها عدد كبير من الناس لانها بتتمتع بكذا طابع سياحي، فيها البحر والثقافة والسهر. وsierra beachfront هو واحد من أجمل المنتجعات الموجودة بالبترون ويلي بيتميز بوجود الـ bungalows بالمي، فيكن تقضوا أحلى الأوقات فيه على الشط وتمارسوا الكتير من النشاطات البحرية، السياحية والثقافية وكمان تعيشوا حياة السهر الحلوة والصاخبة وكل هول بمحل واحد وهو البترون.

الرقم: 145 110 76

٤ – منتجع “مغارة الزحلان“ بالضنية

منتجع “مغارة الزحلان” عبارة عن معلم سياحي رائع بمنطقة الضنية يلي فيكن تمارسوا فيها أنشطة عديدة. بنبلش بالمنتجع يلي في العديد من النشاطات متل: مغارة الزحلان الرائعة، التلفريك، الفندق، المطعم، المتحف الأثري، المتحف التراثي، الشاليهات، شاليهات الأشجار، القطار، الجسر المعلق، نبع الزحلان والبحيرة .أما بعيدًا عن هالمنتجع الحلو فيكن تعيشوا تجربة كتير حلوة بالأماكن الموجودة بالضنية وتحديدًا بمدينة سير: الجسر المعلق الموجود بجبال الأربعين، معبد سيبتيموس سيفيروس وهو واحد من أكبر المعابد من نوعه بلبنان، قصر الأحلام المغطى بالحجارة الملونة.

الرقم: 222 491 06

٥ – مطعم وفندق دير الأمراء بمنطقة دير القمر

دير القمر هي قرية تاريخية بتتمتع بجمالها العمراني التاريخي وبطبيعتها الخلابة. للأشخاص يلي بحبوا المناطق الجبلية القروية والبعيدة عن البحر دير القمر هي أفضل خيار. فيكن تعملوا فيها عدد كبير من النشاطات وتعيشوا وحدة من أحلى التجارب بفندق دير الأمراء الأثري، يلي بيخليكن تعيشوا أجواء تاريخية، كما انه فيكن تزوروا: قصر موسى، مغارة كفرحيم، مغارة عين وزين، ميدان داني شمعون ومتحف ماري باز لي بيعتبروا من أجمل الأماكن بلبنان.

الرقم: 71119935

٦َ – vantastic_vw بالشوف

للأشخاص لي بيحبوا الـwildlife والاستكشاف اخترنالكن واحد من أهضم المطارح يلي ممكن تزوروها ولي هو مشروع vantastic_vw الموجود بالشوف والقريب من منطقة الباروك. فيكن تاخدوا واحد من أهضم الفانات أو السيارات المجهزة متل البيت وتعيشوا فترة حلوة ومهضومة فيها، بالإضافة للمحلات لي ممكن تزورها وقريبة منه متل محمية أرز الشوف ومحمية أرز الباروك، وكمان فيكن تعملوا رحلة سفاري وتتسلوا وتنبسطوا، وتعملوا سهرات نار بتاخد العقل.

٧– Zaarour Club بالزعرور

منطقة الزعرور هي وحدة من أجمل المناطق بلبنان وبيقصدها السواح بالصيف وبالشتا. هيدي المنطقة بتضم واحد من أجمل المنتجعات السياحية بلبنان ولي هو منتجع الزعرور يلي بقدم أنشطة صيفية وشتوية عديدة منها: السباحة وركوب الدراجة والهوائية وعدد من الأنشطة الرياضية، كما انه بيطل على جبل صنين، الأمر لي بيسمح للزائر يشوف مناظر رائعة بتأمنله راحة نفسية كبيرة. وكمان بهيدي المنطقة فيكن تعملوا نشاطات متل السفاري والهايكينغ.

الرقم: 010 310 04

٨– Laklouk Village Vacances باللقلوق

اللقلوق هي أحد أجمل المناطق اللبنانية وبتتميز بمناظر طبيعية جميلة. منتج Laklouk Village Vacances بيأمن للزوار قعدة حلوة ومريحة كما انه فيهن يمارسوا فيه عدد من النشاطات الرياضية والجبلية ويعملوا سياحة بهالمنطقة لي بتجذب الناس خلال الأربع فصول.

الرقم: 112 441 03

٩ – منتجع la maison de la foret ببكاسين

منطقة بكاسين منطقة بتتمتع بمساحات خضرا واسعة وغابات كبيرة من أشجار الصنوبر.منتجع la maison de la foret موجود بقلب إحدى غابات الصنوبر، هونيك بتقدروا تستأجروا شاليه بعيد عن المدينة وبنص الغابة، كما إنكن بتقدروا تعملوا عدد من الأنشطة الرياضية الجبلية وتتمتعوا بأكل طيب وسهرات ولا أروع. بالإضافة، إنه هالمحل منه بعيد عن جزين المنطقة المليانة بالمحلات الحلوة والسياحية.

الرقم: 222 800 70

١٠– Veer بجونية

أخيرًا وليس آخرًا، ما فينا ننسى منطقة جونية يلي بتتمتع بجمال طبيعي بيسحر الناس وبأجواء رائعة. منتج Veer بيأمن للزوار خدمة مميزة وهو مطلّ على بحر جونية، بالإضافة انه بجونيه فيكن تعملوا نشاطات عديدة وهي: ركوب التلفريك، زيارة سيدة حريصا، الاستمتاع على الشواطئ وبالسوق القديم كما انه فيكن تمارسوا رياضة الـparagliding.