٢٦ شغلة بعدنا منتذكرها من إيام ستار أكاديمي

مين منا ما بتذكر برنامج ستار أكاديمي يلي كنا ننطروا مناطرة كل نهار جمعة لنموه وننبسط شوي ونتسلى، إيام كنا نتابع يوميات الأكاديمية كل يوم على التلفزيون ونحس بالحماس ونرجع نتوتر وقت إعلان أسامي النوميني. أحلى إيام، يا ريت بترجع متل زمان، اليوم حبينا نذكركن بأجمل لحظات وذكريات ستار أكاديمي.

١. غنية feel the love generation يلي كنا كل ما نسمعها نحس بالفرح.

٢. الرقصة المشتركة كل أول برايم.

٣. لحظة التعرف على المشتركين كل أول برايم.

٤. بس كان يجي أوساما لعند الطلاب ويبلش ملاحظاتو لي بضحك والقاسية بنفس الوقت.

٥. غنية “نحنا لمين منغني”.

٦. هيلدا وفساتينها الحلوين.

٧. لحظة إعلان النوميني كل نهار تلاتة الساعة 7.

٨. صفوف الفوكاليز مع مدام ماري.

٩. فقرة 5 top يلي كنا ننطرها كل جمعة لنشوف مين طلع الأول وشو رح يطلعوا جوايز.

١٠. الصداقة الحلوة بين برونو طبال وسينتيا كرم يلي بعدها لليوم.

١١. هضامة وخفة دم محمد عطية.

١٢. غنية “بشارنو” لي عملها محمد عطية لبشار الشطي.

١٣. لحظة موت النجم المحبوب على قلبنا رامي شمالي، رح نتذكروا سوا بهل غنية.

١٤. كيف ولع لبنان نهار يلي ربح في جوزيف عطية لقب ستار أكاديمي 3 وكيف صارت الناس كلها عم تهني بعضها.

١٥. ما فينا ننكر إنو صار ستار أكاديمي حديث الساعة، خاصةً بمواسمو الأولى، صارت كل الناس تحكي عنو الكبار والزغار.

١٦. كيف كتار من نجوم الأكاديمية صارو نجوم الصف الأول ونحنا ما مننسى وين بلشو متل ناصيف زيتون، رحمة الرياض وجوزيف عطية.

١٧. كيف كنا نتوتر كل مرة لحظة إعلان النتائج النهائية للتصويت وكيف بس يجي دور الطلاب ينقوا حدا من زملائن يبقى معن يبلش قلبنا يدق.

١٨. الإستعراض والرقص الحلو وقت تقديم الأغاني.

١٩. وأكيد مدام رولا ريسة الأكاديمية ما فينا ننساها.

٢٠. الضيوف لي كل مرة بيجوا من محل، معقول ننسى وقت لي إجا مساري؟ وكيف كل الناس انغرموا في.

٢١. قصص الحب لي كانت تصير بين طلاب الأكاديمية متل قصة تانيا وميشال قزي.

٢٢. فقرة يوميات الأكاديمية كل يوم قبل الأخبار على الLBC.

٢٣. غنية البداية يلي أكيد بعدها علقانة براسنا: الشهرة هدفن، النجاح حلمن، طموحن المجد…

٢٤. غنية النوميني تبع محمد عطية وبشار الشطي: يبقى دا اي نوميني.

٢٥. كل شي في برامج هواة وأغاني نحطت على التلفزيون ولا واحد فات على قلبنا وتعلقنا في متل ستار أكاديمي.

٢٦. عنجد هل برنامج كان وج لبنان الحلو يلي اشتقنالوا كتير وأكيد كلنا منرجع منقول: يا ريت بيرجع برنامج ستار أكاديمي.