وصل مطعم إيطالي جديد على بيروت

وصل مطعم إيطالي على وسط بيروت وجايبلكن معو كل أكلات روما الشهية. منعرفكن على أفانتي.

القعدة فخمة، اللون الأخضر الفاتح طاغي عليا مع صور لمارلين مونرو وأشهر نجوم العالم القديم. هل محل رح ياخدك رحلة بالزمن على شوارع وسط روما لي بتشوفوها بالأفلام الرومانسية لتحسوا بعظمة إيطاليا وسحر مأكولاتها.

أفانتي مطعم إيطالي كلاسيكي بقدم أطيب الأطباق الإيطالية المشهورة المعمولة على الإيد بكل بساطة وفن وبيتزا على الحطب متل ما بيعملوها بروما.

المينو رح ياخدكن على عالم تاني، كل شي في إيطالي على الأصول. جربوا الكوسا المقلية أو قطع الخبز المتبلين بأربع أنواع جبنة وخلطة الزيتون المتبل والبيتزا المشوية على الحطب مع مكونات طازة وجبنة خفيفة.

رح نخبركن شوي عن البيتزا هون وليش مميزة، أول شي في كتير خيارات رح تلاقوا أصناف البيتزا التقليدية لي كلنا منعرفا، متل المارغريتا، البيتزا النباتية، والبيتزا ببيبروني. بس كمان رح تلاقوا أصناف جديدة متل البيتزا على سمك السلمون المدخن مع صلصة بيضا بتشق النفس وعطر ونفس روما.

الباستا إلها حصتها كمان وما فيكن ما تستمتعوا بكل خلطة وصلصلة من إيطاليا وأطيب شي المعمولة بفطر وصوص سحرية طعمتها ما رح تروح من تحت لسانك وريحتها كمان رح تخطف قلبكن.

ما تنسوا إنو الحلو الإيطالي شي كتير طيب ما فيكن ما تضعفوا قداموا وخاصةً إنو عند أفانتي كل شي بينطبخ على الأصول. خلصوا أكلكن وغطسوا بعالم الشوكولا، طلبوا تيراميسو أو شوكولا مو أو حيالا شي جديد بيطلع قدامكن.

خدوا معكن أغلى شخص على قلبكن!

العنوان: وسط بيروت، حد ميتروبول Métropole.

الرقم: 992 990 01