شهر التوعية عن التوحد: ١٢ شغلة لازم كلنا نعرفها

شهر نيسان شهر التوعية عن التوحد، هل شي بشجعنا كلنا نكتشف هالإضطراب وننشر الوعي حول أهمية التعامل مع هالأشخاص بطريقة صحيحة وطبيعية.

اضطراب طيف التوحد هو مجموعة متنوعة من الحالات العصبية والنمائية. يمكن تتراوح من مشكلة بالتفاعلات الاجتماعية إلى النفور الحسي، وبتظهر بشكل مختلف في كل فرد.

رح نخبركن 12 شغلة لازم تعرفوها عن التوحد!

1. الأشخاص يلي عندهن توحد عندن مشاعر وعواطف وبحسوا

يمكن يكون عندن حالة إسمها ألكسيثيميا، بتصعب علين عملية فهم ومعالجة عواطفن. لكن هيدا الشي ما بيعني إنو ما بحسوا.

2. مدرسة 123 التوحد 123 Autism School هي أول مدرسة خاصة متخصصة باستقبال حالات التوحد بلبنان!

بتأمن هل مدرسة علاجات خاصة وإهتمام كبير للأطفال يلي عندهن توحد لينموا ويكبروا ويتحسنوا بالإضافة لعلاج التحليل السلوكي التطبيقي (ABA) لي بيهدف على مساعدتهن على النجاح وحتى التفوق! هل مدرسة بتخفف العبق عن أهل الولد.

3. جمعية التوحد اللبنانية موجودة بلبنان من أكتر من 23 سنة

هي عبارة عن جمعية بتدافع عن حقوق الأشخاص يلي عندهن توحد بلبنان برآسة الست أروى الأمين حلاوي، وهي أم لطفل عنده توحد عانت من غياب ونقص العلاجات والخدمات لإبنها بلبنان، الأمر لي دفعها على تأسيس جمعية بطالب بهل حقوق.

4. ما في سبب مباشر للتوحد

بحسب الدراسات ما في سبب مباشر ورا حالات التوحد.

5. الأشخاص لي معن توحد ما بخوفوا.

هني متلنا ومتل حيلا شخص بس عندن حالة مختلفة.

6. إحتمال مع الوقت يتطوروا إحتياجات وقدرات الأشخاص يلي عندهن توحد

7. حقوق يلي عندهن توحد قضية من قضايا حقوق الإنسان

كتير بيتعرضوا مرضى التوحد للعنصرية والتسخيف، والبعض بيتجاهل وجودن. لازم نتذكر إنو توفر الخدمات والعلاجات المناسبة أمر ضروري ليقدروا يوصلوا مرضى التوحد لحقوقن ويقدروا يعيشوا بطريقة مقبولة وصحية متلنا، بتسمحلن يكونوا مبسوطين وتيطوروا فكرياً وجسدياً.

8. بعض من يلي عندهن توحد هني أشخاص مبدعين

عندن شغف كبير أو موهبة بالموسيقى والمسرح والفن والرقص.

9. الولاد يلي معن توحد فين يروحوا على المدارس العادية

أكيد المدارس المتخصصة بالتوحد والبرامج الدقيقة هني مفيدين وكتير بساعدوا، لكن هل شي ما بيعني إنو الولاد يلي معن توحد ما فين يروحوا على مدرسة عادية ويعملوا منيح ويتفوقوا بمساعدة متخصصين أو مساعدين أو الأساتذة أو بفضل توفر أدواة للتدريب وشرح متخصص.

10. يلي عنده توحد بالعادة بكون عنده أنماط سلوكية متكررة

الإبتعاد عن هل النمط بأدي للقلق وعدم الراحة النفس. كرمال هيك الأشخاص المحيطين أو الأساتذة لازم يكونوا مراعيين لهل موضوع وما يحرجوا الولد.

11. بعاني طفل واحد من كل 100 طفل من إضطراب التوحد

هل شي بحسب دراسات منظمة الصحة العالمية.

12. زيادة المساعدات الحكومية ضروري

ما فيها تتحمل المؤسسات الخاصة والمنظمات غير الحكومية العبء كلو لتقدم الخدمات للأشخاص يلي عندهن توحد. لازم الدولة تأمن مساعدة ولو بالحد الأدنى للمنظمات المعنية.