مسلسلات تركية قديمة إنشهرت بلبنان

بالرغم من تنوع الدراما اللبنانية والعربية بشكل عام لكن الدراما التركية قدرت تفوت على قلب كل بيت لبناني بعام 2008 واكتسحت الساحة بقوة مع بداية عرضها على قنوات mbc وصار عندها جمهورها الخاص.

وهيك قدرت المسلسلات التركية تترك بصمتها بكل بيت لبناني وتعرفنا من خلالها على الثقافة التركية والموسيقى الحلوي والممثلين الأتراك وحبينا هل الأعمال، تعوا تتذكرها سوا.

1. وتمضي الأيام

مسلسل وتمضي الأيام مسلسل درامي شيق بدور أحداثو بإطار تشويقي ممتع رح يخليك تابع كل الأحداث بشغف، مع وجود كتير مفاجآت خلال الحلقات. بتبلش أحداث المسلسل بزواج “روزا” سرياً من بلغار أحد رجال المافيا ولي صار من أكبر زعما المافيا بتركيا وبتجيب منه طفلة بتسميها “غزل” ولأنها مسيحية بينصحوها الراهبات تحط بنتها بالملجا.

وبعد مرور 7 سنوات على هل الحدث منشوف 3 أصدقاء علي وأسمر وغزل بتجمعهم صداقة رائعة بالملجا. علي وأسمر شافوا اللحظة لي انوضعت فيها غزل قدام باب الملجا وكان بعدها طفلة رضيعة ومن هل لحظة انغرم فيها أسمر. بتتغير مجريات الأحداث وبتنتقل غزل لتعيش مع عيلة تبنتها وسمتها “نادين” وصارت محل بنتن يلي توفت.

بقرروا علي وأسمر ينتقموا من لي عملوا الملجا لأنو بعدوا رفيقتهم غزل، فبيحرقوا المكان وبيهربوا، وبترجع بلحقهم الشرطة وبيمسكوا علي بس. بعد مرور 23 سنة بصير علي ضابط شرطة وأسمر رجل مافيا وغزل دكتورة ناجحة وبيجمعهم القدر مرة تانية ولكن بظروف وأحداث مختلفة.

2. ميرنا وخليل

ميرنا وخليل من المسلسلات التركية لي تعاطف معها الجمهور كتير وحققت نسب مشاهدة عالية بسبب مناقشتها لقضية العذرية وإجبار الفتاة التركية على الزواج من شخص ما بتحبه. بيحكي المسلسل عن بنت إسمها ميرنا عايشة ببرلين بألمانيا مع أمها وبيها وإخواتها الشباب وستها وبتشتغل بمحل حلو.

بتلتقي ميرنا بزميلها بالشغل الشب الحلو “خليل” وبيعشقوا بعض لكن بصر بيها لميرنا بدو يجوزها شخص إسمو “مصطفى” بسبب الدين، بتوافق ميرنا بالقوة وبتترك الشغل بدون ما تخبر خليل شو صاير وبيتفاجأ فيها بس يجبلها غاتو العرس.

بتقرر ميرنا تهرب مع خليل لي بقرر يرجعها على اسطنبول، بس عيلة ميرنا وزوجها مصطفى بيلحقوها وبتتصاعد الأحداث لحديت ما ميرنا بتتزوج خليل. هل المسلسل بطولة كيفانش تاتليتوج وسيديف افجي ومراد دالتابان.

3. لحظة وداع

بتحكي قصة مسلسل لحظة وداع عن حكيمة إسمها “ليلى” وهى مجوزة وعندها بنتين وعايشة مع جوزها الكاتب المشهور وبناتها بسعادة لكن بتتعرض لوعكة صحية وبتكتشف إنو عندها ورم خبيث بالدماغ وبتنقلب حياتها كلياً وبتقرر إنو تخبي عن عيلتها حقيقة مرضها، وبتعمل كل شي لتخلي عيلتها تعيش حياة مستقرة حتى بتقرر تخلي جوزها يتجوز معلمة بناتها لي بتعاني من مرض ما فيها تجيب ولاد وبترتب كل شي لتتجوز “زينب” رجا وتربي بناتها حتى ما يلاقوا حالهن وحيدين بعد ما تموت إمن.

لكن الأحداث بتتغير كلها بعد ما عمل الدكتور “إياد” جراحة لليلى وشفاها من المرض ولكنها بتواجه مأساة تانية وبيحرمها جوزها من بناتها. هل المسلسل من بطولة إيجي أوسلو وبورجو كارا وسنان سومر وجوكان تيبي وسيدا جوفين وفاطمة قرنفل.

4. الغريب

بيحكي هل المسلسل عن بنت إسمها “ناديا” بنت بائع البقلاوة الشهير “عدنان بقلاوجي باجو” لي قرر يجوز بنته لإبن شريكه “سمير” بالقوة، وبتوافق العيلة كلها لأن عدنان وعد شريكو يجوزو بنته.

بتقرر ناديا تهرب من بيتها نهار خطبتها بسبب رفضها هل زواج وبتروح على بودروم عند رفيقتها وبتشتغل لتعيش. وبتتعرف ناديا على شب حلو إسمو “نيكولا” بتفكروا بريطاني ولكنها بترجع تكتشف إنو عيلته من أصول تركية وهاجرت على اليونان من زمان. بينغرموا ببعض وبقرروا يتجوزوا بس أهلن بعارضوا بسبب إختلاف الدين لكن ناديا ونيكولا ما بيستسلموا وبيتجوزوا وبصير كتير تطورات حلوي وشيقة . هل المسلسل من بطولة نهير إردوجان وأوزجور جفيك وإنجين أكيوريك.