نشاطات سوبر مسلية فيكن تعملوها مع ولادكن بلبنان

الولاد ما بحبوا قعدة البيت، كرمال هيك ما لازم توقفوا تاخدوهون مشاوير حلوي رغم كل شي.

عايزين أفكار ومطارح جديدة؟ نحنا بالمرصاد.

1. متحف الفراشات، القبيات

الولاد بطبيعتن بحبوا يكتشفوا وعندن حشرية وبحبوا القصص الخارجة عن المألوف وهيدا المحل كل شي في غريب عجيب: رح ينغرموا!

2. بحيرة بنشعي، زغرتا

رح تصير مكان ولادكن المفضل لأن فين يعيشوا مغامراتن المفضلة ويكتشفوا حالن: فين يجدفوا، يطعموا الحيوانات، يتفرجوا على البط، يشوفوا حديقة الحيوانات وينبسطوا بمشوار بالمي.

3. متحف جبران، بشري

أكيد ولادكن دارسين عن جبران بساعات العربي بس ما بيعرفوا مين بكون خلف الورق والكتب. بهل محل رح فيكن تعرفون علي وعلى بيتو وطريقة حياتو.

4. بيتزا نابولي، كفرحزير الكورة

لتفهم على ولادك بدك تعرف طعمة تمن وشو في شي أقرب على قلب الولاد من البيتزا؟ أكيد ما في شي. هل محل متخصص بكل أنواع البيتزا المعمولة على الطريقة اللبنانية وبلمسة إيطالية وعندو محل مخصص لألعاب الولاد كمان.

5. كيدز فيلاج، كفرشيما

عالم الأطفال بإمتياز: خلي ولادك يعيشوا مغامرات لي بيشوفوا بأفلام الكرتون ولو لنهار واحد. رح يحبوكون كتير!

6. ساحة النجمة، بيروت

أكيد سامعين بساحة النجمة أو مقضايين نص عمركن فيا، الحلو إنو هل ساحة واسعة بغط عليا كتير حمام ويمام بالنهار وبحبوا حدا يطعمين والولاد بيتسلوا بهيك شي. وفين كمان يلعبوا على ال scooter أو البيسيكليت ويركضوا ويتسلوا.

7. هايك على درب المسيلحة، البترون

فيكن تجمعوا العيلة الكبيرة وتطلعوا صوب البترون نهار الأحد وتمشوا قبل الضهر طريق السد وتاخدوا أجمل الصور وتتغدوا ترجعوا بشي مطعم بالبترون.

8. مخيم ومنتزه سوينغز، زرعون

النشاطات على أنواعها بتجتمع عند سوينغز: ألعاب تسلق، بيكنيك، تخييم، يوغا وكتير قصص. وفي كمان مطعم كتير طيب بقد برغر كتير شهية.

9. أرنأون فيلاج، البترون

المحل الأمثل لتقضوا نهار أحد من العمر، على طول في نشاطات وألعاب ما بيخلصوا وكمان الأكل متوفر. وقت الأعياد النشاطات كتير مغرية وبتجاري خيال ولادكن. هل محل متل الحلم!

10. ويك أند بالجبل سوا

فيكن تحجزوا البيت الضيافة لي بناسبكن عبر تطبيق أجار وتستكشفوا كل مرة ضيعة جديدة بلبنان وبأحسن الأسعار. ياي شو حلو!

11. متحف بيروت، بيروت

أكيد ولادكن سامعين عن المتحف الوطني بس على الأغلب ما راحوا علي. فيكن تنظموا رحلة ثقافية وتروحوا سوا وتخبروهن عن لبنان وماضي لبنان وتتفرجوا على الأثارات.

رح تتقربوا أكتر من ولادكن وتقضوا لحظات ما بتتنتسى!