١٠ إشيا فيكن تعملوها بجزين بفصل الخريف

جزين من أجمل مناطق لبنان، مغمورة بالجبال والطبيعة الحلوي وريحة الصنوبر لي بترد الروح. شو فيك تعمل بجزين بفصل الخريف؟

١– غابة بكاسين

غابة صنوبر حلوي كتير فيا كتير ميزات تقليدية متل الأفران الأثرية ومعاصر الزيتون والجسور القديمة والعيون والطواحين الأثرية. وبتتميز الغابة كمان إطلالات بانورامية رائعة على سلسلة جبال لبنان.

٢– شلالات جزين

شلالات جزين من أروع ما يكون، ما في تمرق على جزين بدون ما تتأمل عظمتها وتمتع عينك والنظر. هني من أكبر شلالات لبنان وإذا بدك تشوفون بأوجن تعا بالرببع والشتي وهلق بالخريف فيك تشوف كيف الطبيعة عم تتجدد.

٣– مغارة فخر الدين

مغارة فخر الدين معروفة بشكل خاص وقريبة من الشلالات وإلا قصة كتير مهضومة، سمعوا.. هيي عبارة عن كهف تخبى في الأمير فخر الدين قبل ما يأسرو العثمانيي ويقتلو. كانت هل مغارة مخبى لشعوب المنطقة بوقت الحربين العالميتين الأولى والتانية.

٤– مواقع دينية وأثرية

بجزين في كتير مواقع أثرية ومعابد بترجع لإيام الفينيقيي والرومان. رح تشوفوا العظمة عند زيارة كنيسة سيدة بسري لي تعمرت بسنة 1252، ودير سيدة مشموش (أحد أكبر وأهم الأديرة المارونية بلبنان)، دير بنين، ودير مار بطرس وبولس ودير مزيرعة بقطين ودير مار مطانوس وكنيسة القديس تقلا ببكاسين. بيستاهلوا زيارتكن ومفتوحين للجميع.

٥– هيكينغ ومشي

جزين جزء من درب الجبل اللبناني، فيكن تسلكوا هل درب أو أي طريق تانية وتتأملوا بالطبيعة، تتصوروا وتشموا هوا نضيف.

٦– مونة وأونة

بجزين رح تلاقوا مجموعة مختارة من الأطعمة المحفوظة للشتوية لي بتشمل المونة لي بتتميز فيها جزين من زيت الزيتون للزيتون الحب و الزعتر والصابون والكشك والمربى وصولاً للعرق والنبيد. وعندن كمان أعشاب طبية وشموع مصنعة يدويًا.

٧– مطعم الشالوف

بتاكل عندن أطيب أكل لبناني مع قعدة على رمرمية بطل على الوادي وهوا جنوبي ونسمة خريف.

٨– حرف يدوية

رح تلاقوا إشيا غريبة عجيبة: خناجر مصنوعة من الموزاييك والعضام، أدوات المائدة المصنوعة من خشب الأبنوس والعضام والمزينة بالصدف والدهب والفضة وغيرها من المعادن. من بين أدوات المائدة لي بتلفت النظر، منذكر السكين الفينيقي لي بيحتوي على مقابض منحوتة على شكل طائر الفينيق والمطلي بألوان نابضة بالحياة.

٩– نبيد كرم

نبيد كرم هو مصنع النبيد الوحيد بالمنطقة. هو عبارة عن مؤسسة عائلية بتصنع أجود أنواع النبيد بشغف. الزيارات لازم تنحجز قبل بوقت: 658 485 70.

١٠– قصر فريد سرحال

بعود هل قصر للعصور القديمة وقناطرو مستوحاة من الهندسة العربية.