أطرف ما يمكن تسمعوا إذا كنت ولد وحيد بلبنان

بلبنان قليل ما نلاقي ولد وحيد عند أهله نظرًا لحب اللبناني للإنجاب ولو مش قدرته يعيّش أكتر من ولدين. منهيك استمتعوا معنا بأطرف العبارات والأفكار يلي بتخطر ببال اللبناني بس يعرف إنك ولد وحيد:

١- نيّالك

كلمة نيالك هي أول كلمة منسمعها من الشعب اللبناني. ولو إنت مدمر نفسيًا مثلًا ومنهار. خلص نيالك. شو عبالك. كل شي إلك بعدين. ما عندك إخوة تتقاسم معهن شي. “يا عمّي يمكن موت قبل أهلي.” خلص نيّالك وبس!

٢- ما بتزهق؟

بعد ما يحسدك إنو كلّ شي إلك بيرجع للواقع وبيسألك إزا بتزهق. إنّو إذا ما عندي حياة اجتماعية ودايمًا زارب حالي بالبيت لو عندي ٥ إخوة أكيد لح أزهق. مش مقياس يعني.

٣- ليش أهلك ما جابوا غيرك؟

أولًا أنا ما كنت معهن لأعرف إذا هني ما بدون أو الله ما طعمهن. طبعًا اللبناني الحشور بعد ما جاوبوا هالجواب الديبلوماسي بقلّي طب اسألون شوف ليش.

٤- أهلك مدلّعينك وشايفين منك قبرص!

صحيح كل الدلع إلك بس كمان كل المسؤولية عليك. يعني متل ما بصغرك حملوك ودلعوك بدك تشتغل على حالك لتكون بأحلى صورة عندن وتضلك تفكر لبعيد لأن بالنهاية ما إلون غيرك. ولأ ما بقولوا “إي” على كل شيء؛ بالعكس..

٥- إزا عندك إخوة شو بتعمل؟

إنو أكيد لح تتغير عليّ قصص كتير وأسلوب حياتي بالبيت لح يتغيّر بس هالشي ما بيعني ما فيّ إتأقلم. يعني متل ما إنت ربيت مع إخوة أنا نفس الشي عشت بلاهن وبقدر عيش معهن.

٦- ما لح تصير خال/خالة أو عمّ/عمّة

ما في تعليق معيّن على هالموضوع. بترك لكل شخص حرية الجواب بس شخصيًا ما كتير إلي خلق يكون عندي ولاد خي أو أخت…

وكم من شخص طفش من بيت أهله وتحجّج بالخروج عند قدوم الأخت وأولادها…