اذا زهقت من البيت اتعرف على أجمل الضيع اللبنانية الموجودة بالبترون

قررنا نعمل سفرة بلبنان لنكتشف أكتر وأكتر جمال هالبلد وسفرتنا رح تكون طويلة ومتنوعة ورح نزور أجمل القرى والمناطق يلي عاشت فيها الحضارة الفينيقية والرومانية وكتير غيرن.

يلا نسافر عقضاء البترون ونتعرف على أجمل القرى والمدن البترونية.

رح نبلش بالساحل بأجمل المدن الفينيقية الموجودة عالبحر هي مدينة البترون.

هالمدينة يلي تعتبر من أقدم المدن التاريخية، فيها العديد من الآثارات القديمة متل السور الفينيقي وكنيسة سيدة البحر والسوق القديم والشوارع القديمة التراثية يلي بتحكي الف قصة وحكاية عن أجمل التاريخ الفنيقي.

ومنوصل على كفرعبيدا يلي بتحتوي على أجمل المغاور والكهوف الموجودة بين الصخور بالبحر.

وحامات البترونية يلي ما بتفرق كتير عن سانتوريني اليونانية بجمالها ونظافة بحرها ومطاعمها المتنوعة، و بحامات موجود بين الجبل والبحر على قمة ساحرة دير سيدة النورية.

أما الهري وشكا يلي ما بتكمل الصيفية غير بمشوار غير شكل على أنظف بحر وأجمل المنتزهات والمطاعم الموجودين بهالمناطق.

وهلئ رح نطلع صوب القرى البترونية الرائعة يلي بتتميز بالسكينة والهدوء والقداسة.

كفرحلدا:

بلدة جبلية رائعة بمناخها وطبيعتها، بتتميز كفرحلدا بمناظرها الطبيعية وبشلالها الرائع وبسهلها الزراعي وبوجود نهر الجوز يلي يينتشر على ضفافوا عدد كبير من المطاعم.

تنورين:

جمال تنورين ما بينوصف من بالوع بلعة الشهير لأجمل غابة أرز لبيوتها القرميدية وطبيعتها الخلابة.

دوما:

ما معقول تزوروا البترون وما تزوروا دوما هالقرية الحلوة المعروفة بقرميدها الأحمر وسوقها التراثي القديم.

حردين:

من أجمل قرى البترون بلدة القداسة والمحابس، فيها عدد كبير من الآثارات وعدد كبير من الكنائس والأديرة الأثرية.

جربتا:

من وادي جربتا لدير مار يوسف مكان وجود ضريح القديسة رفقا في جو مليان قداسة وخشوع.

عبدلي:

مين مش سامع بالمغراق هالجنة الطبيعية يلي بتحيطها شجر الحور وكوخ خشب ولا أجمل وبالشتا بتتحول هالمنطقة لبحيرة صغيرة.