١٠ اشياء بتدل انك لبناني

كلنا منعرف انو نحنا كلبنانية منتميز عن غيرنا بكتير اشيا غريبة عجيبة يعني عنا تصرفات ومواقف لا صايرة ولا بتصير ما حدا من غير جنسيات، لهيك تعو نذكركن ببعض القصص إلي فعلاً بتدل انكن لبنانية:

١. علقان بعجقة سير: إذا مقضي نص حياتك بعجقة السير على طرقات لبنان فمنهنيك إنت فعلاً مواطن لبناني.

٢. المعاملات الرسمية:

من بين القصص الي مارق فيا اللبناني هي إنو مقضي نهارو بالداوير الرسمية وممكن بس لينجز معاملة زغيري ما بدا هالوقت.

٣. سابح بسيارتك بفصل الشتاء: بلبنان بالصيفية من روح عالبحر وبالشتوية البحر بيجي لعنا، فالسباحة بالسيارات على الطرقات شي طبيعي كل مواطن لبناني أكيد مارق في.

٤. السهرات والإحتفالات أولوية: اللبناني بضل بايعها وعايشها حتى لو كان البلد مزلزل، وبقلك وين السهرة اليوم لو شو ما كان صاير.

٥. بتتكلم ٣ لغات: تعدد اللغات بالجملة الوحدة هي من بين القصص الي بتميز اللبناني.

Hi كيفكن ça va؟

٦. ديليفري ارجيلة: عنا بلبنان قيك تطلب دليفيري أرغيلة لوين ما كان، أكيد هالقصة ما صايرة ولا بتصير بغير بلدان.

٧. المظاهر والدين:

اللبناني ما بيمشي على قدو يعني مستعد يغرق حالو بالدين بس ليركب بسيارة جديدي أو يفشخ على غيرو.

٨. عدم الالتزام بالمواعيد: القصة الي أكيد معروفة إنو اللبناني ما في أشطر منو بعدم الإلتزام بالمواعيد.

بقلك صرت واصل وبكون بعدو بالتخت.

٩. اللبناني متعدد المهام: يعني ممكن تلاقي اللبناني عم بسوق، ياكل، يدخن وحامل التلفون بالسيارة، قصص ما بتصير إلا عنا بلبنان.

١٠. المعجم الخاص: من القصص الي أكيد بتميز اللبناني إنو عنده معاني خاصة فيه لكل كلمة متل “طيب” وكمان عنده معجزات باللغة العربية متل “أنا إذا عصبت بعصب”.