بمناسبة عيد الأم، شو الاشيا يلي بتميز الأم اللبنانية؟

لو شو ما صار ما النا غنى عن حكياتها واهتمامها وعصبيتها وعجقتها، ما في أهم من وجودها حدنا. تعو نعرفكن على بعض الاشيا يلي بتميز الأم اللبنانية.

١. الأم اللبنانية ما في أطيب من أكلاتها وطبعاً بجن جنونها بس تعرف اذا طلبوا ولادها دليفري وما أكلوا من طبخها.

٢. بالنسبة للأم اللبنانية دايماً الأوضاع مش منيحة يعني اذا طلع انفجار بالصين بتقفل البواب حتى ما نضهر من البيت.

٣. أهم شي بس توصل مأخر عالبيت بتكون بعدها ناطرة وبتقلك جملتها الشهيرة “شو فاتحين أوتيل”.

٤. دايماً أمك بدها تقارنك بولاد العيلة وتقلك ليه ما بتكون متلن؟

٥. تأكد اذا شي مرة جاوبت امك جواب ما عجبها بتقلك من مين عمتتعلم هالجوابات هيدا مش انت!!

٦. الأم اللبنانية لما تعصب من ولادها بتقول رح اترك البيت وما رح تعرفوا وين بدي روح.

٧. المصيبة لما تسألك امك وين رايح وتقلها ضاهر وبتسفقك جملتها الشهيرة شو ما بتقعد بالبيت يعني كل يوم ضهرا.

٨. أكتر شي بجننها لما ترجع عالبيت ويكون مكركب، بتصير تقول خاربين البيت بغيابي ولك شو بتعملوا اذا بترك البيت كم يوم.

٩. الإم اللبنانية فيها أهم ميزة انو لما توعيك الصبح بتقلك صارت الساعة ١٠ وهي بتكون الساعة ٧ من وين بيجو زيادة هالساعات مش معروف.