أطيب مطاعم الشاورما بلبنان

“إذا زاد سعر الشاورما بهاجر #بلد_كبيس”

هالشعار استخدم مؤخراً بالثورة، وشو قولكن معقول تغلى الشاورما ؟

ايه كل شي معقول بلبنان، بس هالمرة اخترنالكن أطيب مطاعم الشاورما يلي بعدها محافظة على أسعارها.

١. حطبة ونار:

أكيد المشوار بيستاهل من بيروت على عكار وتحديداً القبيات لتاكلوا أطيب شاورما بخبز التنور عالحطب.

العنوان: القبيات

٢. أبو صبحي:

الشاورما عند أبو صبحي مكسرة الدني بطعمتها يلي بتشهي والأطيب من هيك أكيد لما تاكلوها بخبز التنور المحمص.

العنوان: طرابلس

٣. سناك الأستاذ:

الأستذة إلها عنوان والأستاذ قصتوا قصة مع الشاورما وأنواعها، أكيد رح تاكلوا عندوا أطيب كعكة بالشاورما وأطيب شاورما رولز وأطيب شاورما مع زيادة توم.

العنوان: فرن الشباك

٤. أبو جوزيف:

ومين ما بيعرف ابو جوزيف صاحب أطيب شاورما بالعالم، هالمطعم يلي صرلوا اكتر من ٢٠ سنة فاتح لازم تجربوا لتعرفوا السر الموجود بهالسندويتش العالمية.

العنوان: سن الفيل.

٥. شاورما وصاج:

الشاورما بهالمحل ولا أطيب من هيك فيكن تطلبوها بخبز صاج أو عادي والأكيد انو رح تاكلوا أطيب كبة بالشاورما.

العنوان: صيدا

٦. شاورما لاب:

أطيب شاورما وأغرب أنواع الشاورما منبلش من الشاورما بالحر وخبز التنور و سلطة الشاورما والحمص بالشاورما وكتير أنواع رح تلاقوها بهالمطعم.

العنوان: الحازمية

٧. أبو العز:

رح يقدملكن أبو العز أشهى شاورما مليانة بالكرم والأطيب من هيك كيف بلتوا الخبزة بزيت الشاورما وبحمصوها.

العنوان: الدكوانة

٨. أبو وسيم:

لازم تجربوا أطيب شاورما عند أبو وسيم وخاصةً شاورما السواريه.

العنوان: الحمرا

٩. سبايسد أند سلايسد:

معقول تاكلوا شي مرة شاورما مكسيكية أو شاورما بالأفوكادو؟ أكيد معقول لأن كل إختراعات الشاورما موجودة بهالمحل والشاورما عندوا بتحكي عن حالها وعن طعمتها.

العنوان: الحمرا

١٠. كاي بي دونر:

يلي عبالوا يجرب الشاورما التركية كمان من الدونر للدوروم انتوا اختاروا الأفضل.

العنوان: بليس