ببلاش وللعموم: غرفة قعدة جديدة ببدارو

ضمن وحدي من ورشات "أسبوع بيروت للتصميم"، وبالتعاون مع جمعية تجار بدارو، تم إنشاء هالقوضة الروعة، بلا حيطان وبلا بواب، وسط الشارع للكل "يتفضلوا"…"القعدة ببلاش"!

قدام الغرافيتي الحرة والزاهية، منشوف مقاعد وطاولات بلون الخشب الطبيعي مثبتة عالرصيف بعوارض حديدية ممكن استخداما متل خيمة بتحمي الرواد من الشمس. في كمان شاشة سينما زغيرة بتتنزل وقت العروض.

الفكرة من هالمبادرة هي تلبية حاجة صارت ملحة بالنسبة لصحاب المشروع: توفير المزيد من الأماكن العامة بلبنان حتى يقعدوا فيها الناس بدون ما يضطروا يطلبوا شي ويدفعوا حقو. وهيك مطارح اكيد بتزيل الحواجز بين الأفراد على ختلافن وتنوعن وبتعزز التواصل الإيجابي بينن لخلق مجتمع محب ومتعاون.

فيكن تتابعوا نشاطات الجمعية (أفلام، تلوين، العاب…) وتشاركوا فيا من خلال صفحتن عفايسبوك.