شوفوا معنا كيف فيكن تقضوا نهار حلو بطرابلس

لو كان عندي نهار كامل لنفسي بطرابلس، هيك بقضي:

بلشوا نهاركن بترويقة دسمة وطيبة:

أول خيار في يكون بيض بينديكت بيتقدم مع الهليون والصلصة الهولنديه اللذيذة والسلمون المدخن ب كافيه رصيف يللي موجود بشارع عشير الدايه بمنطقة الضم والفرز. هيدا الصحن حيعتيكن انطلاقة مثالية لنهاركن بعاصمة الشمال.

السعر: ٠٠٠ ٢٠ ليرة

وإذا كنتوا بتفضلوا وشي لبناني أكتر، الحلاب هو أطيب مكان للكنافة. قصر الحلو موجود بشارع رياض الصلح.

السعر: ٥٠٠ ٣ ليرة لبنانية

خلصنا من الترويقة، صار وقت نتجول. هاي البعض من الأشياء يلي لازم تشوفوها بطرابلس:

١. الأسواق القديمة:

حتحسوا حالكن دخلتوا عالم جديد أول ما تفوتوا على شوارع السوق القديمة بطرابلس. أصحاب المحلات حيبلشوا يلوحولكن تتفوتوا تشوفوا البضاعة. بيتألف السوق من سوق العطارين، وسوق البازركان، وسوق الحدادين ، والحراج، وسوق الكندرجيه، وسوق النحاسين، سوق السماك وسوق الصياغين وكتير غيرهن. الأسواق بتحتوي على الحمامات التركية كمان يللي لازم تشوفوها.

٢. قلعة طرابلس:

بنيت هيدي القلعة من قبل حاكم طرابلس، رايموند دي سان جيل بعام ١١٠٣. بتقدروا تفوتوا لجوا وتاخدوا صور كتير حلوة بتطل على المدينة.

٣. محطة القطار القديمة:

بدأ هيدا القطار يشتغل بعام ١٩١١ وكان عندو خط واحد بوصل حمص عطربلس. أصبحت السكة مهجورة بعام ١٩٧٥، وأصيبت بأضرار بالغة بالحرب الأهلية، بس ما فينا ننكر إن أكتر الأشيا سحرا بالحياة هي يللي بتضرر. هيدا الموقع لازم تزورا لما تجوا عطربلس.

٤. معرض رشيد كرامي الدولي:

معرض رشيد كرامي هو من الأشياء الأساسية للازم تشوفها بطرابلس. بتقوم العديد من المعارض والحفلات الموسيقية بهيدا المعرض، والعام الماضي أقيمت شجرة الميلاد بطرابلس فيه. صممه المهندس المعماري البرازيلي أوسكار نيماير بعام ١٩٦٠، وبعدو عمل غير مكتمل. بغض النظر عن العجقة برا، بمجرد دخولكن إلى المعرض حتبطلوا تسمعوا شي، وحتبقوا مسحورين بجمال المكان.

٥. كورنيش الميناء:

خلصنا المعالم السياحية، مين عبالو يروح يتمشى عالبحر؟ تجربة الهدوء يللي حتختبروها بكورنيش الميناء ما إلا مثيل. تحدثوا مع أحد بائعي القهوة وتعرفوا عحسن الضيافة الشمالية، من بعد ما تشتروا القهوة اللذيذة منو.

٦. شوارع حارة المينو:

تخيلو معي: مباني قديمة مستحدثة من قبل الغرافيتي على الجوانب، حتشوفوا بعض صور للسياسيين كمان. البنايات ما بتتجاوز الثلاث طوابق ومجموعين سوا متل أكوام الورق. الشرفات مغطاة بالغسيل ومعقول حتى تلحقوا و تشوفوا نسوان عم يتدردشوا مع بعض من البلاكين. الهياكل الحجرية للبنايات بتضيف رونق للمكان ولمسة عتيقة بتناسب الشارع والأزقة الصغيرة. الأطفال وين مكان عم يركضوا ويلعبوا لابسين الفلانيل ومبوردين. ضحكاتهم العالية بتتناسق مع صوت دواليب الدراجات الهوائية كأنو اللعب والضحك خلقوا بس لهل أطفال. هيدا مستخلص عن حارة المينو، وقت بتروحوا انتو، خبرونا شو شفتوا.

شفتوا، سمعتوا، وشميتوا كل شي، صار وقت الغداء:

تعرفوا على هيدي اللايحة الواسعة من مطاعم بطرابلس يللي بتقدم مختلف أنواع المأكولات، إضغطوا هون.

شخصياً المطعم يللي كتير حبيتوا عن جديد هو مات، موجود بشارع عشير الداية بمنطقة الضم والفرز.

بتتكون قائمتهم من أنواع المأكولات المتنوعة، وإذا كان عبالكن تشوفوا أكتر من هل أطباق الشهية إضغطوا على الإنستجرام تبعن فوق.

هلق صار وقت تناول القهوة والحلويات:

إذا ما كنتوا بتعرفوا سارة وكريم، صار لازم تتعرفوا عليهم. سارة وكريم بيمتلكوا وبيديروا هيدا الكافيه الموجود بالمعرض، وحتحسوا حالكن بالبيت أول ما تفوتوا. بيقوموا بإعداد الكعك والحلويات المصنوعة عاليد، بالإضافة للشاي اللذيذ. أحلى قعدة بعد الضهر عند سارة وكريم!

مفروض تكون صارت الساعة ٨ مساء هلق وصار وقت السهر:

حترجعوا على مينو، لأنو هونيك السهر موجود. تيميز حيكون خياركن الأول، بيستضيف هيدا المكان عدد من الفنانين والفرق الموسيقية. موقعو كتير حلو، ببيت حجري قديم بيتألف من طابقين مع الطابق الثاني يللي مركب متل شرفة حتى تشوف وتحضر الفرق من فوق. اطلبوا المشروب مع البوتين والأجنحة والفاهيتا (إيه كلن)، وشوفوا إنو حتستمتعوا كتير بالليلة.