٢١ شغلة فيكن تستمتعوا فيا لما تكونوا عايشين لوحدكن

طبعاً في ناس ما بتحب الوحدة وما بتتحملا أبدا، بس كمان في ناس بتلاقيها حلوة ومفيدة أمرار وبتستغلا لتعمل كتير قصص بتحبا وبتسليها وما بتقدر تعملا عطول. طرحنا سؤال: "بشو ممكن تستمعوا لما تكونوا عايشين لوحدكن؟" على مجموعة ورجعنا بأجوبة مختلفة ومتنوعة فيا المتوقعينوا ويلي ما بيخطر عالبال:

١- بدخن بلا ما حدا يحاسبني.

٢- بفوت عالمطبخ وبفجر مواهبي باختراع الأطباق الجديدة.

٣- بسمع الموسيقى يلي بدي ياها وبعلي الصوت قد ما بدي.

٤- بطلب ديليفري قد ما بدي وما حدا بيعرف!

٥- بفكر عصوت عالي وما بستحي إحكي مع حالي.

٦- بقعد كل الوقت بالأندروير وما بفكر إلبس تياب.

٧- فيني كون عل كمبيوتر طول النهار وما بسماع نق.

٨- بفوت وبضهر من البيت ساعة يلي بدي.

٩- ما برد عالتليفون إذا ما طالع عبالي إحكي وما بفتح الباب إذا ما جايي عبالي شوف حدا.

١٠- بستقبل مين ما بدي ساعة يلي بدي.

١١- بربي حيواناتي المفضلة وبجيب منن كتير، حتى لو كانوا اغريبين ومش مألوفين بالبيوت.

١٢- بزرع شتل وبهتم فيه وبسقيه كل يوم.

١٣- ما ضروري حدث حدن الصبح قبل القهوة.

١٤- بفرح لما حس إنو بتحمل مسؤلية مصاريف البيت، وهيدا بزيد ثقتي بنفسي.

١٥- بحط ليستا بالإشيا يلي بدي أعملا وبحس حالي قادر/ة إنجزا بالكامل لأن ما عم ركز عشي تاني وما في شي عم بشتتلي تفكيري.

١٦- ما بكون مضطر/ة ضلني كامش/ة الريموت كونترول لأن وحدي عم بتحكم بشو بدي إحضر.

١٧- بعيش وسط فوضتي يلي بعتبرا خلاقة ومصدر وحي لشغلي وإبداعي.

١٨- بلاقي غراضي محل ما حطيتن بدون ما يكون حدا أخدن وضبن مدري وين.

١٩- بتعلم إتحمل مسؤولية حالي.

٢٠- باكل وما بجلي.

٢١- بنام وبنام لساعات طويلة ومتواصلة بدون ما شي يعكرلي صفو أحلامي.

… وأكيد الأجوبة ما بتخلص. كونوا حرّين تشاركونا بشو كل واحد فيكن بيمبسط لما يكون لوحدو، تحت بالتعليقات.