بيروت عم تحتفل بيوم المرأة العالمي

بمناسبة يوم المرأة العالمي، وتحت شعار “قضايانا متعددة وغضبنا واحد”، مشيوا لبنانيات ومقيمات ولاجئات ومهاجرات وعاملات وأمات وطالبات وناشطات ومثليات ومتحولات وعابرات الجنس من دويرة العدلية لجنينة حوض الولاية، مبارح الأحد، الساعة ١٢.

المسيرة يلي ما خليت من رجال داعمين لقضايا المرأة وحقوقا، شكلت جسر متين من تضامن نسوي رائع وملفت بتنوعو بالجنسيات والأعمار والإنتماءت الدينية والثقافية. الكل طالب بالعدالة للكل وانرفعت يافطات بتندد بالذكورية بالشارع والبيت والشغل والمدرسة والجامعة. المشاركات والمشاركين بالمارش صرخوا بصوت واحد ضد الزواج المبكر، تعنيف المرأة من قبل الأب أو الأخ أو الزوج، التمييز بالترباية بين البنت والصبي، التحرش والإغتصاب وطالبوا بإعطاء الأم المتزوجة من أجنبي حق منحا الجنسية لولادا وحق الحضانة للمطلقة…اليافطات حملت كمان جمل ضد نظام العبودية القاهر يلي بيخضعولوا المساعدات بالبيوت بالإضافة للإساءات الفظية والجسدية يلي بيتعرضولا وبتضلا طي الكتمان، وكان في تحية للنساء السوريات يلي عم يتعذبوا بوحدي من أشرس حروب الحاضر.

الإحتفالية السنوية يلي بتكرر كل سنة ببيروت، عم بتكون مرة عن مرة أحلا وأكبر، وعم بتضم، بالإضافة لوجوه مألوفة ومعروفة من زمان بالنضال النسوي، وجوه شابات وشباب مليانين حماس وصدق من أجل التغيير وبناء مجتمع عصري ومدني.

تنعاد عنساء لبنان والدني.