مجموعة من اللبنانية حبوا يشاركونا خلطاتن الغريبة بالأكل

طلبنا من مجموعة من الناس تخبرنا عن وصفاتا العجيبة والمفضلة. الأجوبة كانت جميلة جداً وما خيبتلنا أملنا ولا لحظة!

رح نعرض هون أفضل التعليقات يلي سمعناها عن الموضوع ونجرب نرضي متعة التذوق عندكن:

حلوم مشوية + توست + عسل

حمروا الحلوم مع شوية زبدة بالطاوية وحطوها فوق قطعة توست مدهونة بالعسل. هيدا ألذ شي ممكن تحصلوا عليه السبت الصبح مع فنجان شاي أخضر.

– نور حطيط, ItsNourHere@

ستيك + زبدة الفستق

ضيفوا القليل من زبدة الفستق عستيك البقر قبل ما يستوي مع رشة ملح وبهار، بصل مقلا، وإشيا تانية طيبة بتحسوها ممكن تغني النكهة. مزيج رائع من الحلو والمالح!

– نور حسون, nourthemale@

لبنة + مربى التين

أي نوع مربى تاني بيمشي حالو كمان. يمكن مش هالخلطة المجنونة، بس شوي بتعطي إحساس التشيز كيك المحضر عالسريع. اختاروا لبنة عادية، مش من هاي يلي فيا شرش حموضة.

– ألين , nouchaline@

منقوشة + شيبس عخل

تعوا نرجع لورا بالزمن، عإيام المدرسة، لما كنا نجيب منقوشة الزعتر سخنة وطازا، نفتح كيس الفانتازيا عخل ونحطن بقلبا. يمممم شو طيبة، وعطول طيبة!

– ربيع سكيني, beirutfood@

شوكولا + كريب جبنة

شي مرة مجربينا؟ خليني خبركن عنا لأن عن جد رح تحبوها. هي نوع من بيتزا عشوكولا، بس مع عجينة الكريب المحمصة والمحمرة. بنصحكن تجيبوا الموزاريلا هون لأنا مش مالحة. دوقوها بليز وعطونا رأيكن.

– كريسينا، LebanonEats@

جبنة بيضة + بطيخ

أكلة تقليدية ومعروفة طبعاً. إنتعاش البطيخ وملوحة الجبنة الخفيفة بشكلوا مع بعصن سناك صيفي لطيف، أو طبق تحلاية مميز لبعد الغدا.

– ميريام، Myr_Naj@

مربى المشمش + بري

اكشفت هالأكلة بمحل بالجميزة. قلي البارتندر ضروري جربا وهيك صار. من وقتا هي وحدة من أطيب “المازة” عندي. قطعة البري الطرية فوق شرحة الخبز الفرنسي مع شوية مربى مشمش عالوج ما بتتفوت… ومن بعد أول لقمة بس مش رح تقدروا توقفوا!

– ميريام، Myr_Naj@

بوظة عحامض + سفن أب

هي بديل للسفن أب عنكهات. بكل بساطة، خدوا معلقة زغيرة من هالبوظة (بشرط إنا تكون من نوع السوربيه)، ودوبوها بكباية سفن أب أو حتى مع بيرييه. مشروب لذيذ، بيروي عطشكن بإيام الصيف مع لدعة خفيفة بتفرفح القلب.

– ميريام، Myr_Naj@

بطاطا مقلية + لبنة بتوم

معقول؟ إيه معقول. هاي اكتشفتا باليونان لما طلبت بطاطا مقلية ولاحظت إنا بتتقدم هونيك مع صوص تزازيكي المصنوعة من اللبن المدوب، الحبق، الخيار المجفف، التوم والملح. كل ما بشتاق لهالتغميسة، بطلب بالمطعم صحن لبنة بتوم حد البطاطا المقلية.

– ميليسا، melissaabdo@

حمص + كاتشاب

إيه، لأنو أنا من هول يلي بحبوا ياكلوا كاتشب مع كل شي تقريباً، ومع الحمص بالتحديد: وصفة غير شكل!

– بلال، silxntwandererr@

شيبس عخل + لبنة

هوي سناك فيلم السهرة بلا منافس. إذا قلبكن قوي كفابة وبتحبوا المغامرة جربوها مع التورتيلا.

– حنان سمعان، H_Semaan@

سندويش موز مع الحليب المركز والمحلى

أكيد لازم يكون ماركة نستله وما بينفع أي شي تاني. بصراحة ناسي أي متى دقتا أول مرة. الله يخليلي ياكي ماما على هالإختراع الكلو إبداع!

– حنان سمعان، H_Semaan@

شيبس / بطاطا مفلية + لبنة

بالنسبة إلي ما في شي غريب بالموضوع، بس بحس يلي من جيل جدي وستي بيستفزن قول: “هول أطيب شغلين مع بعض دايقتن بحياتي!”

– إيليسا، batenjeen@

ترجمة: رنا قاروط