أفضل مسابح عائلية بلبنان

بتحبوا الشمس والبحر والسما والرمل؟ بدكن تقضوا أوقات صيفية ممتعة مع ولادكن؟ منعرفكن على أفضل المسابح العائلية بكل لبنان.

١– لايزي بي:

موجود بالجيّة، يعتبر اللايزي بي واحد من أشهر المسابح العائلية بلبنان. هوي المكان المثالي لتقضوا يوم مسلي مع ولادكن والأصحاب. المسبح بيحتوي على بسينين، قناة مي طبيعية، رمل، عشب أخضر طري وبحر جميل… هون في كل شي بخلي المكان كامل متكامل. فيكن تمضوا نهار طويل ممددين عوحدي من المراجيح الكتيرة المنتشرة بكل الأرجاء، أو تقعدوا عالشط الرملي والآمن مع الزغار.

٢– شط صور الشعبي:

هوي، وبدون أي منافسة، أفضل شط بلبنان. الأسعار معقولة كتير وبمتناول الجميع، المي نضيفة وبتجنن، والإدارة ودودة ولطيفة وبتشرف على المكان بطريقة منظمة وفعّالة. وصلوا الصبح بكير وحجزوا قطعة من الرمل الدهبي وشمسية كبيرة وملونة. أحسن شي هون إنو الدخول مجاني. إيه، صدقوا بعد في شي ببلاش بهالبلد! يللا ضبوا الشنطة، جهزوا الولاد ووعدوا حالكن بيوم طويل وغير شكل.

٣– إده ساندز:

أجمل مسبح بمدينة جبيل لتستمع العيلة كلا بنهار تحت الشمس. فيكن تمارسوا الألعاب المائية بالبيسين وتشبعوا من البحر. الأكل كتير طيب وبيرضي أذواق الكبار والزغار.

٤– نادي السبورتينغ:

المسبح البيروتي العريق مجهز ببركتين كبار ووحدي للأطفال. النزول للبحر مأمن بشكل سليم، وفيكن تتمددوا على الكراسي الكتيرة المنتشرة حول البيسينات. المأكولات والمشروبات ممتازة ولذيذة، وكل العيلة رح تكون مبسوطة. هون بتعيشوا نهار صيفي بيروتي بكل معنى الكلمة.

٥– كيمبيمسكي سمرلاند:

من الكلاسيكيات البيروتية كمان. هالصيف كيمبيمسكي سمرلاند بيرجع بيفتح بوابوا ليستقبل العيل من جديد. هالمكان بيمبسطوا فيه الولاد كتير، والأوقات يلي رح تقضوها معن رح تتحول لأحلا ذكريات العمر. كيمبيمسكي سمرلاند مسبح عائلي بامتياز.

٦– بينني بيتش:

بشكا، بالشمال، هالمسبح هوي المرجانة المخفية عن الأنظار. الدخولية كتير رخيصة (١٠،٠٠٠ ل.ل بس للكبار وللزغار ٥،٠٠٠). الشط الرملي من أروع ما يكون. هون فيكن تكونوا مبسوطين مع ولادكن ورفقاتكن بدون ما تضطروا تدفغوا مبلغ كبير.

٧– ريو لينتو:

الملعب المائي الأول بلبنان، ريو لينتو شكل، من زمان، وجهة عائلات لبنانية كتيرة. روحوا مع عيلتكن وقضوا نهار طويل من المغامرات تحت الشمس. الولاد رح يكونوا سوبر محمسين!

ترجمة: رنا قاروط